“İnflyasiya bank sektorunun genişlənməsində mühüm rol oynayır” – Xalid Kərimli

“Bank sektoru bu il 13,5% artım göstərib. Ötən illə müqayisədə bu göstərici bir qədər aşağıdır; keçən il artım 17–18% səviyyəsində olub. Lakin iqtisadiyyatın real artımı bu il 1%-i keçmir, əvvəlki illərdə isə 2–3% səviyyəsində olub. Bu vəziyyət göstərir ki, bank sektorunun artım tempi iqtisadiyyatın real artımı ilə tam üst-üstə düşmür. Bank sektorunun genişlənməsində inflyasiya və əhalinin nominal gəlirlərindəki artım da mühüm rol oynayır. Hər il pulun dəyəri təxminən 6–7% azalır ki, bu da inflyasiyanın təsirini göstərir. Eyni zamanda, son iki ildə əhalinin nominal gəlirləri inflyasiyanın üzərində artıb”.

Bu fikirləri Aznews.az-a açıqlamasında iqtisadçı ekspert Xalid Kərimli deyib.

Qeyd edək ki, 2025-ci il avqustun 1-nə Azərbaycanın bank sektorunun aktivləri 55 700,1 milyon manat təşkil edib. “APA-Economics”in Azərbaycan Mərkəzi Bankına istinadən verdiyi məlumata görə, bu göstərici ötən ilin eyni dövrü ilə müqayisədə 13,5% artıb.

Ekspert bildirib ki, bu vəziyyət bank sektorunun böyüməsi üçün əlavə imkanlar yaradır və kredit portfelinin artım potensialını yüksəldir.

“Hazırda bank sektorunun portfeli böyüsə də, onun ümumi daxili məhsula nisbəti qonşu ölkələrlə müqayisədə hələ də aşağıdır. Yəni sektorun artım potensialı mövcuddur. Bank sektorunun verdiyi kreditlərin ÜDM-ə nisbəti hələ ki, potensialdan aşağıdır, bu isə artımın davam edə biləcəyini göstərir. Narahatlıq doğuran məsələ odur ki, maliyyə sektorunun artımına baxmayaraq real sektor eyni sürətlə inkişaf etmir. Bu fərq, iqtisadiyyatın dayanıqlı inkişafı baxımından diqqətə alınması vacib olan göstəricidir”.

Rəfiqə Namazəliyeva,

AzNews.az