BTC ilə indiyədək 557 mln. tona yaxın Azərbaycan nefti nəql olunub

Bakı-Tbilisi-Ceyhan boru kəməri ilə bu günədək 557 milyon tona yaxın Azərbaycan nefti nəql edilib.

Bu barədə Aznews.az Energetika Nazirliyinə istinadən xəbər verir.

Məlumata görə, 20 il əvvəl – 2006-cı ilin 4 iyun tarixində Bakı-Tbilisi-Ceyhan boru kəməri ilə nəql edilmiş ixrac xam nefti yüklənmiş ilk tanker yola salınıb.

Bakı-Tbilisi-Ceyhan boru kəməri vasitəsilə Xəzər dənizinin Azərbaycan sektorunda yerləşən “Azəri-Çıraq-Günəşli” yataqlarından hasil edilən neft və “Şahdəniz” yatağından hasil olunan kondensat Azərbaycandan nəql edilir. Bakı-Tbilisi-Ceyhan boru kəməri Səngəçal terminalından başlayıb Azərbaycan, Gürcüstan və Türkiyə ərazilərindən keçərək Aralıq dənizinin Türkiyə sahilindəki Ceyhan dəniz terminalınadək uzanır.

2006-cı ilin iyun ayından istismara verilən Bakı-Tbilisi-Ceyhan boru kəmərinin neftlə doldurulmasına 2005-ci il may ayının 10-da başlanılıb və xam neft Ceyhan terminalına 2006-cı il mayın 28-də çatıb.