Kişilərdə xərçəng riskini üçqat artırır

Dünya üzrə kişilərdə xərçəng halları sürətlə artır.

Alimlər bildirir ki, 2050-ci ilə qədər 19 milyon kişiyə xərçəng diaqnozu qoyulacağı gözlənilir. Bu mənzərə ilə paralel aparılan yeni araşdırma sonsuzluq ilə bəzi xərçəng növləri arasında diqqətçəkən əlaqəni ortaya çıxarıb.

1,1 milyon kişinin məlumatları araşdırılıb

Lund Universitetində aparılan tədqiqatda kişilərdə sonsuzluq ilə xərçəng riski arasındakı əlaqə araşdırılıb.

Araşdırma çərçivəsində 1,1 milyondan çox ata olmuş kişinin məlumatları analiz edilib. Bu kişilərdən 14 min 540-nın sonsuzluq problemi yaşadığı və köməkçi üsullarla ata olduğu müəyyən edilib.

Tədqiqat göstərib ki, ciddi sonsuzluq problemi olan kişilərdə kolorektal xərçəngə tutulma riski təxminən iki dəfə, qalxanabənzər vəz (tiroid) xərçəngi riski isə təxminən üç dəfə daha yüksəkdir.

Araşdırmada iştirak edən Michael Kitlinski bildirib ki, əvvəllər sonsuz kişilərdə prostat və xaya xərçəngi riskinin artdığı məlum olduğuna görə bu istiqamətdə əlavə araşdırma aparılıb.

Genetik “sistem” xətası?

Tədqiqatda sperma sayında və keyfiyyətində olan problemlərin genetik mənşəli ola biləcəyi vurğulanıb. Tədqiqatçı Angel Elenkov genetik səviyyədəki problemlərin yalnız reproduktiv sistemi deyil, bədənin digər sistemlərini də təsir edə biləcəyini və xəstəlik riskini artıra biləcəyini deyib.

Mütəxəssislər qeyd edir ki, 1973-cü ildən bəri dünyada sperma sayı təxminən 60 faiz azalıb. Bu azalmada piylənmə, siqaret, alkoqol istifadəsi, fiziki hərəkətsizlik və ətraf mühit faktorlarının rol oynadığı bildirilir.

Erkən xəbərdarlıq siqnalı ola bilər

Mütəxəssislər bildirir ki, kişilər adətən 30-35 yaşlarında uşaq sahibi olmaq istədikdə sonsuzluq testi etdirir, lakin sonradan bu vəziyyət izlənilmir.

Araşdırmaçılara görə isə sonsuzluq testinin nəticəsi xərçəng üçün “erkən xəbərdarlıq siqnalı” kimi də qiymətləndirilə bilər.