İdmançıların təlim-məşq prosesi barədə ətraflı məlumat verilib İdmançıların təlim-məşq prosesi barədə ətraflı məlumat verilib
  • Mahal
  • 14 Avqust 2020 11:15
  •  3 416

Boccia İdman Federasiyası Şəki Şəhər İcra Hakimiyyətinin qonağı olub - FOTO

İdmançıların təlim-məşq prosesi barədə ətraflı məlumat verilib

Avqust ayının 10-dan etibarən Zaqatalada təlim məşq toplanışı keçirən Boccia İdman Federasiyası Şəki Şəhər İcra Hakimiyyətində İcra başçısı Elxan Usubovun qonağı olub.

AzNews.az Gazette.az-a istinadən xəbər verir ki, bu gün Şəki Şəhər İcra Hakimiyyətinin İcra başçısı Elxan Usubov Boccia İdman Federasiyasının üzvləri ilə görüşüb. Görüş zamanı E.Usubova Boccia İdman Federasiyasının Baş katibi İlham Məhərrəmov, həmçinin ictimaiyyətlə əlaqələr və mətbuat katibi Nərmin Kazımova tərəfindən federasiyanın fəaliyyəti, idmançıların təlim-məşq prosesi barədə ətraflı məlumat verilib. Federasiyanın üzvləri ilə tanışlıqdan məmnunluğunu ifadə edən icra başçısı öz şəxsi fəaliyyətində də fiziki məhdudiyyətli şəxslərə xüsusi diqqət ayırdığını bildirib. Həmçinin qeyd edib ki, Şəkidə Əlillərin Bərpa Mərkəzinin təmiri başa çatıb və yaxın günlərdə fəaliyyətə başlayacaq.

Sonda Boccia İdman Federasiyasının nümayəndələri tərəfindən boccia idman növünün inkişafı və daha çox fiziki məhdudiyyətli şəxslərin bu idman növünə cəlb olunması məqsədilə E.Usubova Şəkidə regional klubun açılması təklif olunub. İcra başçısı isə bildirib ki, Boccia İdman Federasiyası ilə əməkdaşlığa hər zaman hazırdır və davamlı layihələrdə birgə əməkdaşlığın tərəfdarıdır.

Qeyd edək ki, ölkəmizin regionlarının sosial-iqtisadi inkişafını xüsusi diqqət mərkəzində saxlayan Prezident İlham Əliyevin siyasətində regionların inkişafı əsas hədəflərdən biridir. Ölkə başçısı tərəfindən həyata keçirilən siyasətin əsas məqsədi paytaxtımızla yanaşı bütün bölgələrimizin də hərtərəfli inkişafının təmin edilməsi və bölgələrimiz tarazlı şəkildə inkişafıdır.

2007-ci ilin dekabrından 2011-ci ilin may ayının 23-dək Ağstafa Rayon İcra Hakimiyyətinin başçısı, 2011-ci il may ayının 23-dən etibarən isə Azərbaycan Respublikası Prezidentinin Sərəncamı ilə Şəki Şəhər İcra Hakimiyyətinin başçısı vəzifəsinə təyin edilmiş E.Usubov dövlət başçısının uğurlu siyasətini rəhbər tutaraq Şəki şəhərinin tarixi hissəsində yerləşən mədəni irs nümunələrinin mühafizəsinin təmin edilməsi, ərazidə bərpa, yenidənqurma, konservasiya, təmir, yeni tikinti, abadlıq, bədii tərtibat işlərinə nəzarətin daha da gücləndirilməsi, tarixi hissənin memarlıq dəyərinə və üslubuna xələl gətirən bəzi tikililərin uyğunlaşdırılması, mədəni irsə zərər vurulmasının qarşısının alınması məqsədilə maarifləndirmə işlərinin aparılmasına xüsusi diqqət ayırmış, Şəki şəhərinin davamlı inkişafı təmin edilmiş, insanların rahat yaşaması, rayonun aqrar və turizm potensialından daha səmərəli istifadə olunması üçün mühüm işlər görüb.

Son olaraq qeyd edək ki, Prezident İlham Əliyevin təşəbbüsü və dəstəyi ilə Şəkinin xalq tətbiqi sənəti hər il Fransanın Kolmar şəhərində keçirilən Milad bazarında nümayiş olunur. 2008-ci ildən Dünya Tarixi Şəhərlər Liqasının üzvü olan Şəki şəhəri 2016-cı ildə TÜRKSOY-un mədəniyyət paytaxtı elan edilib, 2017-ci ildə isə UNESCO-nun Yaradıcı Şəhərlər Şəbəkəsinə daxil olunub. Azərbaycan Respublikasının Birinci vitse-prezidenti Mehriban xanım Əliyevanın təşəbbüsü və rəhbərliyi ilə Şərq memarlığının nadir incisi hesab olunan “Xan sarayı ilə birgə Şəkinin tarixi mərkəzi” 2019-cu ilin iyulun 7-də Bakı Konqres Mərkəzində keçirilən UNESCO-nun Ümumdünya İrs Komitəsinin 43-cü sessiyasının növbəti iclasında UNESCO-nun Ümumdünya İrs Siyahısına daxil edilib.

image description image description