İnternetdə ictimai mənəviyyatın qorunması - ARAŞDIRMA

Milli Məclisdə müzakirəyə çıxarılan qanun layihəsi internet mühitində ictimai mənəviyyatı təhqir edən və cəmiyyətə açıqca hörmətsizlik ifadə edən hərəkətlərin qadağan olunmasını nəzərdə tutur. Bu dəyişiklik sosial şəbəkələrdə etik normalara zidd paylaşımların qarşısını almaq və gənclərin zərərli informasiyadan müdafiəsini gücləndirmək məqsədi daşıyır.

Müasir dövrdə sosial media platformaları informasiya axınının əsas kanallarına çevrilib. Onların iş prinsipi daha çox diqqət cəlb edən paylaşımları önə çıxarmağa əsaslandığından, qeyri-etik və mənəvi dəyərlərə zidd məzmunlar sürətlə geniş auditoriyaya çatır. Bu, yalnız Azərbaycanda deyil, qlobal miqyasda da ciddi müzakirə mövzusudur. Məsələn, Avropa İttifaqı 2022-ci ildə qəbul etdiyi "Digital Services Act" çərçivəsində sosial şəbəkələrdə zərərli məzmunun yayılmasına qarşı daha sərt mexanizmlər tətbiq etməyə başladı. ABŞ-də isə platformaların məsuliyyətini artırmaq üçün “Section 230” üzərində dəyişikliklər müzakirə olunur. Çin və Hindistan kimi ölkələrdə isə sosial media məzmununa nəzarət daha sərt qaydalarla həyata keçirilir.

Azərbaycanın qanun layihəsi bu qlobal tendensiyaların bir hissəsi kimi dəyərləndirilə bilər. Qanunvericilikdə ictimai mənəviyyatı təhqir edən ifadələrin, jestlərin və davranışların kütləvi nümayiş etdirilməsinin qadağan olunması, xüsusilə yeniyetmə və gənclərin davranış modellərinə mənfi təsirlərin qarşısını almağa yönəlib. Bu yanaşma həm milli-mənəvi dəyərlərin qorunmasına, həm də sosial sabitliyin möhkəmlənməsinə xidmət edir. Çünki gənclərin sosial şəbəkələrdə gördükləri məzmun onların davranışlarını formalaşdırır və uzunmüddətli perspektivdə cəmiyyətin mədəni kodlarına təsir göstərir.

Eyni zamanda, qanun layihəsi internet mühitində məsuliyyət mexanizmlərinin dəqiqləşdirilməsini nəzərdə tutur. Bu, platformaların və istifadəçilərin hüquqi öhdəliklərini daha aydın şəkildə müəyyənləşdirəcək. Qlobal təcrübə göstərir ki, sosial media tənzimləmələri yalnız qadağalarla deyil, həm də maarifləndirmə və rəqəmsal savadlılığın artırılması ilə effektiv olur. Avropa və Asiya ölkələrində bu sahədə paralel olaraq ictimai kampaniyalar həyata keçirilir. Azərbaycanın da bu istiqamətdə addımlar atması qanunun tətbiqini daha balanslı və dayanıqlı edə bilər.

Nuray,

Aznews.az