Dünyanın ən bahalı yaxtalarından biri Bakıya gətirilib

Azərbaycanın sifarişi ilə Xorvatiyada hazırlanan, dünyada ən böyük və lüks yaxtalardan hesab olunan "Caspian Star" (Xəzər Ulduzu) Bakıya gətirilib. Lent.az-ın əldə etdiyi məlumata görə, təxminən 1 il müddətinə hazırlanan "Caspian Star" artıq Bakı buxtasındadır. Yaxta Adriatik dənizi, Egey Dənizi, Bosfor və Dardanel Boğazları, Qara dəniz, Kerç boğazı, Azov dənizi, Rostov-Don kanalı, Volqa çayını keçərək, bir neçə gün əvvəl Xəzər sularına daxil olub.

Yaxtanın uzunluğu 60 m, eni 10.68 m, hündürlüyü 3.1 m, maksimal sürəti 13.7 dəniz mili təşkil edir. Yaxta 70 sərnişini qısa səyahətlərə çıxara bilir və 2 lüks salona malikdir. Üstəlik, göyərtədə əlavə istirahət yerləri, gəmini sahibi və VİP qonaqlar üçün isə böyük kabinələr var.

Azərbaycan bayrağı altında üzən "Caspian Star" 11 ay ərzində hazırlanıb. Bu, Brodosplit - Special Naval Shipyard gəmiqayırma şirkətin lüks yaxtaların hazırlanması istiqamətində növbəti addımı hesab edilir.

Bakıya gətirilmiş bu yaxta dünyada ən böyük və lüks yaxtalar kateqoriyasına aid edilir.