II Ümumdünya Mədəniyyətlərarası Dialoq Forumu olacaq

Mədəniyyət və Turizm Nazirliyinin Beynəlxalq əlaqələr və mədəniyyət proqramları şöbəsinin müdiri Vasif Eyvazzadə Fransanın Paris şəhərində səfərdədir. Səfərdə məqsəd YUNESKO-nun qeyri-maddi mədəni irs üzrə hökumətlərarası işçi qrupunun iclasında iştirak etməkdir.

Mədəniyyət və Turizm Nazirliyindən verilən məlumata görə, YUNESKO Baş Qərargahında keçirilən görüşdə 2003-cü il Konvensiyası və onun direktivləri, Qeyri-maddi mədəni irs üzrə siyahıdakı nominasiyalar, təsnifat qaydaları, "oxşar elementlər"in daxil edilməsi qaydası, daxil edilən elementlərin mühafizə yolları və məlumatlandırılma və s kimi mühüm mövzular ətrafında müzakirələr aparılıb.
Səfər çərçivəsində həmçinin, BMT Sivilizasiyalar Alyansının Strateji məsələlər üzrə müşaviri Jan Kristof Bas və YUNESKO nümayəndələri ilə görüşlər zamanı 2013-cü ildə Bakıda keçiriləcək II Ümumdünya Mədəniyyətlərarası Dialoq Forumuna hazırlıq prosesi müzakirə olunub.

Bahar Rüstəmli
AzNews.az