“III Maliyyə və İnvestisiya Forumu” gəlir - Təsisçilər yenilikdən danışdılar!

Forumda iştirak etmək üçün müraciət edənlərin sayı reklam işlərinin uğurla aparıldığının bariz nümunəsidir

Son zamanlar ölkəmizin iqtisadi sahədə əldə etdiyi nailiyyətləri, inkişafı nəinki bizim elə bir sıra dünya ölkələrinin də diqqət mərkəzindədir. İqtisadi inkişafın yüksək səviyyədə özünü göstərməsi dövlətlə yanaşı özəl investorların da səyi nəticəsində formalaşır desək yanılmarıq. Azərbaycanın ən böyük investisiya forumu olan “FIF Maliyyə və İnvestisiya Forumu” (Financial Information Forum) da bu məqsədlə fəaliyyət göstərir. Sayca 3-cü olacaq Maliyyə və İnvestisiya Forumu 4 may 2019-cu il tarixində “Pullman” oteldə ölkəmizin aparıcı şirkətlərinin iştirakı ilə “İnnovasiya və şəffaflıq” devizi altında keçiriləcək. Ölkə əhəmiyyətli forumun mahiyyəti, məqsədi, yenilikləri haqqında təsisçilər İqtisadiyyat.az saytına danışıblar.

“ANC GROUP”un baş maliyyə direktoru, təsisçi Emin İsmayılov bildirib ki, hər il dünya iqtisadiyyatında trend olan mövzular ətrafında xarici və yerli mütəxəssislərlə birgə müzakirələr aparılır. Onun sözlərinə görə, bu ilki sloqan da məhz dünya bazarının tələblərinə uyğun olaraq seçilib. Bugün dünyada və Azərbaycanda maliyyə və investisiya sahəsində innovativ məhsullarla rəqabət üstünlüyünun əldə edilməsi, blokçeyn BigData kimi texnologiyaların maliyyə sisteminə tətbiqi, finteklər, nağdsız maliyyə əməliyyatları, offşorlarla mübarizə və şəffaf hesabatlıq əsas tendensiyalardır. Emin İsmayılov onu da bildirib ki, bu ilki xarici spiker ABŞ-da və Yaponiyada uzun müddət iş təcrübəsi olan investisiya şirkətinin rəhbəridir. Xarici spiker, investisiya cəlb etməyin yolları barədə məlumatların yerli sahibkarlarla bölüşəcək. Dünyanın ən məşhur şirkətlərindən olan “SAP”-ın nümayəndəsi bank sektorunda olan ən son trendlər, yerli investisiyalar, biznes proseslərinin avtomatlaşdırılmasından danışacaq. Sonda isə Biznes və İnnovasiyalar panelində biznes idarəçiliyi və innovasiyalar sahəsində uğurlu olan şirkət rəhbərləri ilə interaktiv sual cavab sessiyası olacaq.

“Məqsədimiz qlobal iqtisadi modellərin ölkəmizdə tətbiqi, maliyyə savadlılığının artırılması, sahibkar və dövlət münasibətlərini inkişaf etdirməkdir”

Emin İsmayılov bildirdi ki, dövlət başçısının apardığı sosial-iqtisadi islahatlar sahibkarlığın inkişafından əlavə sahibkar və dövlət arasındakı münasibətlərə də müsbət töhvələr verəcək.

“Forum dünyada və Azərbaycanda maliyyə və investisiya sahəsində aktual mövzuları geniş ictimaiyyətə çatdırmaq üçün bir platformadır”

Bu sözləri “Baker Tilly”şirkətinin konsaltinq xidmətləri direktoru, təsisçi Niyazi Abbasov deyib. O, da öz növbəsində forumun maarifləndirmə məqsədli olduğunu bildirib. Niyazi Abbasovun fikrincə, forumun keçirilməsinin formatı, seçilən mövzular beynəlxalq standartlara uyğunlaşdırılır.

Həmçinin o, qeyd edib ki, ölkə iqtisadiyyatının inkişafı yolunda bütün yükü dövlətin üzərinə atmaq düz deyil. Bu işdə özəl sektorun da marağı olmalıdır. Bu baxımdan təşkil olunan forumun keçirilməsində məqsəd, maliyyə və investisiya sahəsində beynəlxalq təcrübədən yararlanmaq, həmin mexanizmləri Azərbaycanda da tətbiq etməkdir.

“ADMEDİA reklam agentliyi olaraq forumun piar işlərini üzərimizə götürmüşük. Ötən illərdə olduğu kimi, bu ili də uğurla başa vuracağımıza əminəm”

“ADMEDİA” şirkətinin rəhbəri, təsisçi Sabit Məmmədov forumun piar işlərinin yüksək səviyyədə aparıldığını vurğulayaraq, ölkənin ən reytinqli xəbər agentlikləri ilə media tərəfdaşlığının olmasını dilə gətirib. Onun sözlərinə görə, hazırda III Maliyyə və İnvestisiya Forumu üçün küçə reklamlarından və digital reklamlardan istifadə olunur. O, həmçinin sosial media üzərindən də tanıtım aksiyaları keçirildiyini qeyd edib. Forumda iştirak etmək üçün müraciət edənlərin sayı da reklam işlərinin uğurla aparıldığının bariz nümunəsidir. Sabit Məmmədov bundan əlavə bildirib ki, telekanallar, xəbər agentlikləri və portallar da forumu işıqlandıracaqlar.

AzNews.az