Erkin Qədirli: “Mən ancaq ReAl-ı sata bilərəm ki...”

"Onların qarşısında heç bir öhdəliyim yoxdur"

“Mənim, ya da elə bütövlükdə ReAl-ın ünvanına satqınlıq ittihamını cəbhəçilər edir. Nədən etdiklərini güman edə bilərəm, amma burada yazmaq istəmirəm. Bir şey aydındır ki, onların ritorikasında terminoloji aydınlıq yoxdur”.

AzNews.az "AzPolitika.info"ya istinadən xəbər verir ki, bu barədə ReAL Partiyasının qurucu üzvü, 16 saylı Yasamal ikinci Seçki Dairəsindən deputat seçilmiş Erkin Qədirli bildirib.

O, barəsində səsləndirilən ittiham və qınaqlara belə aydınlıq gətirib:

“Birincisi, hər kəs yalnız öz təşkilatını sata bilər. Məsələn, mən heç cür AXCP-ni və ya başqa müxalifət partiyasını sata bilmərəm, çünki onların qarşısında heç bir öhdəliyim yoxdur. Mən, nəzəri olaraq, ancaq ReAl-ı sata bilərəm ki, belə bir şey baş verərsə, bundan ancaq ReAl-çılar narahat ola bilərlər.

İkincisi, bir təşkilatdan çıxıb başqa təşkilata girmək, ya da heç bir təşkilata girmədən vaxtilə üzv olduğun təşkilatı tənqid etmək satqınlıq deyildir. ReAl-dan çox adam gedib, ara-sıra ReAl-ı tənqid edirlər, amma heç bir ReAl-çı onları satqın adlandırmır, çünki burada satqınlıqdan söhbət belə gedə bilməz. Belə söhbətləri ancaq cəbhəçilər edirlər, partiyalarından gedən az qala hər kəsi satqın adlandırırlar.

Üçüncüsü, satqınlıq ancaq bir təşkilatda qalaraq, başqa bir təşkilata işləmək şəklində olur. ReAl-da heç kəs belə bir iş görməyib. Odur ki, ReAl-da satqın axtarmaq, ReAl-ı satqınlıqda suçlamaq əbəsdir”.

Erkin Qədirli vurğulayıb ki, hökumətlə anlaşmaq, onunla əməkdaşlıq etmək tamam başqa söhbətdir, onun satqınlıqla heç bir əlaqəsi yoxdur: “ReAl hökumətlə siyasi (!) danışıqlara hazır olduğunu çoxdan bildirib. Hökumət istəyərsə, ReAl belə danışıqlara gedə bilər. Danışıqların nəticəsində bir anlaşma olarsa, ReAl onu gizli saxlayası deyil - yazılı olacaqsa, mətnini yayarıq, şifahi olacaqsa - şərtlərini. Bu günə olan durum budur - ReAl-ın hökumətlə heç bir anlaşması yoxdur”.

Şəxsən özünə gəlincə, E.Qədirli bildirib ki, onun hakimiyyətin çeşidli çevrələri və qurumlarıyla əlaqələri heç zaman sirr olmayıb: “Bu əlaqələrin də ReAl-la heç bir bağlılığı olmayıb. Mən bu əlaqələrimdən nə özüm üçün bir fayda götürmək, nə də başqalarına ziyan vurmaq üçün istifadə etmişəm. Mən bu əlaqələrimi "məsafəli hörmət" adlandırıram. Hakimiyyətdəkilərlə münasibətlərimin yaxın olduğu dönəmlər də olub, uzaq olduğu dönəmlər də. İndi görünən odur ki, yenidən yaxınlaşma baş verməkdədir. Bunun təşəbbüskarı mən deyiləm və hakimiyyətin məqsədini ancaq güman edə bilərəm. Odur ki, mənim də hakimiyyətdəkilərlə, bu günə olan duruma görə, heç bir anlaşmam yoxdur. Yaxınlaşma var, anlaşma yoxdur. Olarsa, biləcəksiniz. Mən açıq yaşayır, açıq oynayıram”.

ReAL üzvü sonda qeyd ediub ki, müxalifətin hökumətlə mütləq açıq münasibətləri olmalıdır. “Bunsuz siyasi mədəniyyət inkişaf edə bilməyəcək”.