Saakaşvili ilə İvanişvilinin görüşü gözlənilir

Bu gün Tiflisdə prezident Mixail Saakaşvilinin və baş nazir vəzifəsinə ən ehtimal olunan namizəd, parlament seçkilərində qalib gəlmiş "Gürcü arzusu" koalisiyasının lideri Bidzina İvanişvilinin görüşü nəzərdə tutulub.

APA-nın svobodanews.ru saytına istinadən verdiyi xəbərə görə, görüşdə parlament seçkilərindən sonra Gürcüstanda vəziyyət, yeni parlamentin ilk iclasına hazırlığın müzakirə olunması planlaşdırılır. Qeyd edək ki, parlamentin ilk iclasında yeni hökumətin tərkibi təsdiq olunmalıdır. Dünən İvanişvili nazirlər postuna namizədlərin siyahısını açıqlayıb. Seçki ərəfəsində gərgin mübahisələrə baxmayaraq İvanişvili bildirib ki, "Saakaşvili konstruktiv mövqe tutduğu halda onunla əməkdaşlıq etməyə hazırdır".

Gürcüstan parlamentinin yeni tərkibində "Gürcü arzusu" koalisiyası 83 mandata, hakim "Vahid milli hərəkət" isə 67 mandata sahibdir.

AzNews.az