Aygün Bəylər stress keçirib

O, sənətdən küsüb

Əməkdar artist Aygün Bəylər fəaliyyətində yaranan fasilələr aydınlıq gətirib. Bu barədə AzNews.az-a A.Bəylər özü məlumat verib. O, bildirib ki, işlərində fasilə yaranmasına səbəb təhsili və körpəsiylə bağlıdır: "Hazırda Bakı Musiqi Akademiyasının bəstəkarlıq fakültəsinin 3-cü kurs tələbəsiyəm. Bu, ikinci ali təhsilimdir. İşlərim də fasilə yaranmasına səbəb bu və körpəmlə bağlıdır. Çünki körpəmə də baxıram. Bundan başqa, sənətlə bağlı çox stress yaşayıram. Musiqi dünyamızda haqq-nahaq problemləri çoxdur. Mən də qərara aldım ki, başımı aşağı salıb, həm öz yaradıcılığımla məşğul olum, həm də analıq borcumu yerinə yetirim. Elə ən çox da körpəyə başım qarışıb. Dekabr ayının 5-i onun 3 yaşı tamam olacaq".

A.Bəylər musiqi sahəsində şahidi olduğu problemlərdən danışaraq, müəyyən iradlarını bildirdiyini deyib: "Problemlər tək musiqidə deyil, bütün sahələrdə var. Həmin problemlərə qarışmıram. Öz işimlə məşğul oluram. Amma müəyyən iradlarım var ki, yeri gələndə qeyd edirəm. Təsirli olub-olmamasını deyə bilmərəm, amma mən öz fikrimi bildirirəm".

Fuad Mədətov
AzNews.az