Ramiz Mehdiyevin kirəlik kuklası - Azay Quliyev yazır

Dövlət Təhlükəsizliyi Xidmətinin dünən apardığı əməliyyat-istintaq tədbirləri illərdir ictimai rəydə oturuşan bir həqiqəti rəsmi şəkildə təsdiq etdi: AXCP sədri Əli Kərimli ilə Ramiz Mehdiyev arasında gizlin saxlanılan, dövlətə xəyanət xarakteri daşıyan əməkdaşlıq real imiş və bu işbirliyi uzun müddət Azərbaycan dövlətinə qarşı yönəlmiş fəaliyyətin mərkəzində dayanıb.
Bu gün xalq bir daha görür ki, bu insanlar nə qədər mənəviyyatsız, nə qədər riyakar, nə qədər nankor ola bilərmiş. Prezident Administrasiyasının rəhbəri kimi ölkənin ən yüksək postlarından birində oturub, az qala hər gün Azərbaycan Prezidentinin qarşısında müticəsinə dayanaraq ona sədaqət andı içib, eyni zamanda arxa otaqda dövlətə xəyənət planları hazırlayıb, Əli Kərimli ilə gizli işbirliyi quraraq onu təmsil olunduğu hakimiyyətin üstünə qışqırtmaq yalnız Ramiz Mehdiyev kimi təhlükəli və hiyləgər birisinin edə biləcəyi alçaqlıq və rəzillik ola bilərmiş. Əli Kərimlinin yaratdığı Milli Şuranı və onların təşkil etdiyi mitinqləri maliyyələşdirmək, xarici dairələrin sifarişi ilə dövlətin sabitliyinə zərbə vurmaq və ölkədə xaos yaratmaq, Prezidentimizi milli hədəflərdən yayındırmağa və dövlətimizi xarici ölkələrin vassalına çevirməyə çalışmaq bu xalqa və millətə qarşı edilmiş ən bağışlanılmaz düşmənçilik və xəyanətdir. Görünür, Kremlin tərəfindən Ramiz Mehdiyev məhz bunun üçün yetişdirilibmiş, Əli Kərimli ilə birləşərək milli maraqlarımıza, dövlət müstəqliyyimizə və suverenliyimizə qarşı olmazın təxribatlarını törətmək tapşırığı da eyni mərkəzdən daxil olurmuş.
DTX-nın Əli Kərimlinin evində apardığı axtarış zamanı əldə etdiyi faktlar da məhz bu bir həqiqəti təsdiq edir. Artıq tam bəllidir ki, 2013-cü ildə Kremldə hazırlanan “milyarderlər ittifaqı” adlı xain planın içində Ramiz Mehdiyev – Əli Kərimli tandemi əsas icraçılardan biri olub. Dövlət çevrilişi ssenarisi, ölkədə siyasi böhran yaratmaq niyyəti və hakimiyyətin qeyri-konstitusion yolla ələ keçirilməsi üçün Rusiyadan dəstək istənilməsi ilə bağlı təkzibolunmaz faktlar ortaya çıxıb.
Bu xəyanət layihəsini bu il də həyata keçirməyə çalışan “xəyanətkar cütlük” bu dəfə, necə deyərlər yaxalanıblar, açığa çıxarılıblar. Heç şübhə yoxdur ki, bu gün dövlətimiz tam şəkildə bilir ki, Mehdiyev–Kərimli xəyanət şəbəkəsində daha kimlər olub və onların da ictimai ifşası üçün hazırlıqlar yekunlaşmaqdadır.
Bütün bu dəhşətli xəyanət planları, dövlət və siyasi institutları sarımış xainlərin çirkin əməlləri üzə çıxdıqca, düşünürsən ki, Prezident İlham Əliyev bu dövləti təkcə xarici düşmənlərin hücumlarından və məkrli planlarından deyil, həm də içəridə qurulan gizli şəbəkələrdən, dövlətçiliyə zərbə vurmaq istəyən daxili satqınlardan da qoruyub. Ramiz Mehdiyevin illərlə yaratdığı gizli təsir dairəsi, monopoliyalar və dövlət idarəçiliyinin müxtəlif sahələrində formalaşdırdığı qaranlıq mexanizmlər zaman-zaman dövlət üçün ən təhlükəli təhdidlərdən biri olub. Lakin dövlət başçısının siyasi iradəsi və qətiyyəti bu bədnam planların hamısını puç edib.
Sonda isə sözüm müxalifətə və AXCP-nin dövlətçilik təəssübü və siyasi məsuliyyəti olan nümayəndələrinədir:
Əli Kərimli ilə Ramiz Mehdiyevin dövlətə və milli maraqlara qarşı olan bu murdar əməkdaşlığını açıq və birmənalı şəkildə lənətləyin!
Dövlətə xəyanət edənlərə ən ağır cəzanı tələb etmək sizin də minimum siyasi borcunuzdur!
Bu rəzilliyə susmaqla Ramiz Mehdiyevin kirəlik kuklası olan Əli Kərimli ilə tarix qarşısında eyni siyasi məsuliyyəti və xəyanət yükünü daşımayın!

Azay Quliyev,

Milli Məclisin üzvü