Sələmçilikdə ittiham olunan deputat - İddiasını geri çəkdi

Sələmçilikdə ittiham olunan deputat Rüfət Quliyev Nuranə Səfərovaya qarşı qaldırdığı iddianı geri çəkib.

Bu barədə deputatı təmsil edən vəkil Kamandar Nəsibov məlumat verib. O bildirib ki, pul tələbinə dair məhkəmə çəkişməsi barışıqla yekunlaşıb.

Onun sözlərinə görə, məhkəmə çəkişməsinin başlanmasının səbəbi ondan ibarət idi ki, Toğrul Rüfət oğlu Rüstəmzadə 2011-ci ildə atasının dostu Namiq Rahib oğlu Səfərovla birgə biznes fəaliyyəti ilə məşğul olmaq məqsədilə çoxsaylı elektron yazışmaları və telefon danışıqları aparıb, Bakıda və xaricdə görüşüblər. Toğrul Rüstəmzadə özü daim xaricdə yaşayıb işlədiyindən pul vəsaitlərini atası vasitəsilə Namiq Səfərova verib. Amma aradan uzun müddət keçdiyinə baxmayaraq Namiq Səfərov biznes fəaliyyətini qura bilməyib, aldığı pulları T.Rüstəmzadəyə geri qaytarmayıb və 2015-ci ilin mart ayında vəfat edib.

Mərhumun varisi olan həyat yoldaşı Səfərova Nurana Mirzəli qızı ilə ilkin danışıqlar nəticə vermədiyindən məhkəməyə müraciət olunmuşdu. Məhkəmə baxışı ərəfəsində mərhum Namiq Səfərovun həyat yoldaşı Nurana Səfərova mərhum ərinin Toğrul Rüstəmzadə ilə çoxsaylı elektron yazışmaları ilə yaxından tanış olandan sonra ərinin həqiqətən də Toğrul Rüstəmzadəyə böyük məbləğdə pul borcu olduğunu etiraf edib və bu məbləğdən cəmi 80 (səksən) min ABŞ dollarını ödəmək imkanında olduğunu bildirib. Mərhum N.Səfərovun ailəsinin düşdüyü ağır maddi durumu nəzərə alan T. Rüstəmzadə bu az məbləğlə razılaşıb.

Bununla tərəflər arasında barışıq tam şəkildə bərpa olunub və məhkəmə çəkişməsi bitib.

Sözügedən məhkəmə çəkişməsi ilə bağlı maraqlı faktlar əldə edilib. Məlum olub ki, hadisənin baş verdiyi 2011- ci ildə deputatın oğlu Toğrul Rüstəmzadə 16-17 yaşında olub. 18 yaşı olmayan gəncin sahibkarlıq fəaliyyəti ilə məşğul olması inandırıcı görünmür. Daha bir detal isə ondan ibarətdir ki, əslində haqqında iddia qaldırılan mərhum Namiq Səfərovun həyat yoldaşı Nurana Səfərova qeyd edilən məbləği qarşı tərəfə ödəməyib. Deputat öz ictimai nüfuzuna zərər gəlməsin deyə pul iddiasını geri çəkib...

Qafqazinfo.az