- Köhnə - Cəmiyyət
- 6 Sentyabr 2013 12:25
- 2 547
Əbülfəz Qarayev vətəndaşlarla görüşüb
A |
A |
A
Mədəniyyət və Turizm Nazirliyindən APA-ya verilən məlumata görə, 40-a yaxın vətəndaş əvvəlcədən Mədəniyyət və Turizm Nazirliyinə və rayon mədəniyyət və turizm şöbələrinə müraciət etməklə qəbula yazılıb.
Müraciətlərdə yerlərdə musiqi və incəsənət məktəblərinin fəaliyyətinin genişləndirilməsi, yeni filialların açılması, kitabxana şəbəkəsinin təkmilləşdirilməsi, tarix-diyarşünaslıq muzeylərinin yenidən qurulması, muzeylərdə bədii tərtibat işlərinə kömək göstərilməsi, mədəniyyət müəssisələrinin maddi-texniki bazasının yaxşılaşdırılması, tarix-mədəniyyət abidələrinin bərpa və təmiri, yaradıcı insanların fəxri adlarla təltif edilməsi, işlə təmin olunma və digər məsələlər yer alıb.
Qəbula yazılmış vətəndaşları dinləyən nazir səslənən bütün məsələlərin nəzərdən keçiriləcəyini, onların həlli üçün müvafiq addımların atılacağını deyib.
Əbülfəs Qarayev bildirib ki, ölkə başçısının siyasəti regionlarda insanlar tərəfindən dəstəklənir. Eyni zamanda, vətəndaşlar müxtəlif məsələlərlə bağlı təkliflərlə çıxış edirlər: "Məsələn, regionlarda tarixi abidələrin vəziyyəti insanları narahat edir, onların bərpası, mühafizəsi, tədqiq olunması ilə bağlı məsələlər qaldırılır. Bir sıra müraciətlərdə musiqi məktəblərində müəyyən ixtisaslar üzrə müəllimlərin olmaması, iş və yaşayış şəraitinin yaxşılaşdırılması, tədris işinin təkmilləşdirilməsi kimi məsələlər də yer almışdı. Müəyyən məsələlər - musiqi avadanlıqlarının, rəqs kollektivlərinin geyimlərinin çatışmaması, digər bu kimi müraciətlər dərhal həll olunacaq. Nazirlik tərəfindən lazımi dəstək verəcəyik. Lakin elə məsələlər də var ki, onların həll olunması zaman tələb edir və bununla bağlı müvafiq proqram üzərində işləyirik. Sözsüz ki, bu zaman insanların fikir və təklifləri nəzərə alınacaq".
Nazir bəzi vətəndaşların sosial məsələlərlə bağlı xahişlərinin olduğunu deyərək bu müraciətlərin də diqqətdə saxlanılacağını bildirib.
AzNews.az