- Köhnə - Cəmiyyət
- 13 May 2014 07:07
- 4 796
Adil Əliyev ittihamlara SƏRT reaksiya verdi- SƏNƏD
A |
A |
A
Həmin yazını təqdim edirik:
Yaxından və uzaqdan məni tanıyan insanlar həyatdakı amalımdan xəbərdardılar: başlıca amalım insanlara kömək etmək, ehtiyacı olanlara əl tutmaq, dövlətim və cəmiyyətim üçün xeyirli işlər görməkdir. İntriqalarda, kimisə qaralama kampaniyalarında iştirak etmirəm, kiminsə arxasınca danışmıram, nəyəsə və ya kiməsə etirazım varsa, bunu açıq şəkildə dilə gətirirəm. Bunları indi nəyə görə deyirəm?
Məsələ burasındadır ki, mətbuatda çox görünməyi, yeri gəldi-gəlmədi açıqlama və müsahibə verməyi xoşlamıram. Çünki, əməl adamıyam. Əməlimə görə mənə qiymət verilməsini istəyirəm. Ancaq görürəm ki, bəziləri bunu yanlış qiymətləndirir, haqqımda dedi-qodu, yalan xəbərlər yaymağa çalışırlar. Ona görə də iki məsələyə aydınlıq gətirməyə qərar verdim.
Birinci məsələ "Yeni Müsavat" qəzetinin əməkdaşı Fərahim İlqaroğluna qarşı zor tətbiq edilməsi olayı ilə bağlıdır. Mənim jurnalistlər arasında xeyli dostum, tanışım var. Hamısına da böyük hörmətim var, çünki peşəkar jurnalistlərin necə əziyyətli işlə məşğul olduqlarını bilirəm. Fərahim İlqaroğlunun da mətbuatda çıxan bir sıra reportajını, facebook-dakı statuslarını oxumuşam. Hiss olunur ki, bacarıqlı jurnalistdir. Ona görə də, bəzi mətbuat vasitələrinin Fərahim İlqaroğlu ilə bağlı olayda mənim adımın hallandırılmasına təəssüfləndim. Mənim "günahım" bircə ondan ibarətdir ki, jurnalistə bədən xəsarəti yetirməyi sifariş etdiyi iddia olunan idmançının rəhbəri olduğum Kikboksinq Federasiyası nəzdində keçirilən yarışlarda iştirak etməsi olub. Bəzi saytlarda həmin idmançı ilə mənim şəklimi yanaşı qoyublar. İnternetdə axtarış versəniz, yüzlərlə, bəlkə də minlərlə idmançı ilə ortaq şəklimin olduğunu görərsiniz. Bu təbiidir. Çünki, federasiyamızın nəzdində minlərlə idmançı var, hamısının əlini sıxıram, şəkil çəkdirirəm, mükafat verirəm. Maraqlandım, haqqında danışılan idmançı bir müddət Kikboksinq Federasiyasının keçirdiyi yarışlarda iştirak edib. Ancaq daha sonra bizdən ayrılıb və sonrakı illərdə kimlərin onu himayə etməsi haqqında heç maraqlanmamışam da. Bircə onu bilirəm ki, haqqında danışılan idmançı bir neçə ay öncə Bakıda keçirilən kikboksinq yarışında iştirak edib. Həmin yarışa isə mən elə o zaman etiraz etmişdim. Çünki, həmin yarışı Kikboksinq Federasıyasının razılığını almadan keçirmişdilər. İndi həmin idmançı qanunu pozubsa, sıravi vətəndaş kimi buna görə qanun qarşısında cavab verəcək. İdmanın başlıca prinispi bəllidir: Əsl idmançı yalnız arenada mübarizə aparmalı, adi həyatda digər vətəndaşlardan heç nə ilə fərqlənməməli, heç kimə əl qaldırmamalıdır.
İkinci məsələyə də toxunmaq istərdim. Mayın 2-də Qırğızıstanın paytaxtı Bişkəkdə ümummilli lider Heydər Əliyevin 91 illik yubileyinə həsr olunmuş kikboksinq üzrə turnir təşkil etdik. Bu haqda mətbuatda informasiyalar yayılıb. Çox maraqlı turnir keçdi və 6-6 hesablı bərabərlik qeydə alındı. Soruşa bilərsiniz ki, bu turniri niyə məhz Qırğızıstanda keçirməyə qərar verdik? Federasiyamız Mərkəzi Asiya ölkələri ilə sıx əlaqələr qurmağa çalışır. Qırğızıstan isə Mərkəzi Asiya ölkələri içərisində kikboksinq idmanı üzrə irərilədir. Digər tərəfdən, Qırğızıstan bizə qardaş ölkədir, bu ölkədə isə insanların həyat şəraiti ağırdır. Düşündük ki, qırğız qardaşlarımızın mürəkkəb iqtisadi və sosial dövründə idman yarışı keçirməklə onlara bir növ əl tutaq, turnir keçirib qırğız idmançılarına dəstək olaq. Özləri də bizə deyirdilər ki, öz gücləri hesabına belə möhtəşəm turnir keçirə bilməzdilər. İndi görün bütün bunların müqabilində mənə qarşı qaralama kampaniyasına start verən bəzi üzdəniraq saytlar nə cızmaqaralar yazıblar? Guya Bişkəkdəki turnirdə hesab 7-6 Qırğızıstan idmançılarının xeyrinə bitib və guya mən ictimaiyyətə doğru olmayan informasiya vermişəm.
Yalan, yalan, yenə də yalan! Və bu yalan xəbərin özünü yalanlamaq üçün Qırğızıstanın Kikboksinq Federasiyasına yazılı müraciət etdim ki, qaralama kampaniyasının iştirakçılarını və onlara "informasiya" dəstəyi verənləri sənədlə ifşa edim. Bişkekdən Federasiyamıza göndərilən sənədi Sizin diqqətinizə çatdırıram. Zəhmət olmazsa, sənədi diqqətlə oxuyun və turnirdə hesabın məhz 6-6 bitdiyinə bir daha əmin olun. Bu, yoldaşlıq görüşü idi, mənim nə marağım var ki, real hesabı ictimaiyyətdən gizlədim? İndiki zamanda yarışın nəticəsini gizlətmək olar? Mən Federasiyamızın imkanları çərçivəsində xarici ölkələrdə yarışlar keçirir, dövlətimin, xalqımın idman potensialını dünyada tanıtdırmağa çalışıram, gözü bizim uğurlarımızı götürməyənlər isə bunu qoyur kənara, mənimlə şəxsiqərəzlik aparmaq fikrinə düşür. Belələrinə ancaq bir sözüm var: mənim sizə yazığım gəlir.
AzNews.az Adil Əliyevin yaydığı sənədin tərcüməsini təqdim edir:
"11 may, 2014-cü ildə Qırğızıstan Respublikasının Bişkək şəhərində kikboksinq üzrə beynəlxalq turnir keçirilib. "Heydər Əliyeb Kuboku" uğrunda keçirilən turnirdə Azərbaycan və Mərkəzi Asiyanın yığma komandaları iştirak edib. Beynəlxalq turnir Kojomkul adına İdman sarayında üç mindən çox tamaşaçının iştirakı ilə keçirilib. Açıq turnirdə Qırğızıstan Respublikası Gənclər Nazirliyinin, Dövlət Bədən Tərbiyəsi və İdman Agentliyinin nümayəndələri, eləcə də Azərbaycan Gənclər və İdman Nazirliyindən xüsusi qonaqlar və hər iki dövlətin Kikboksinq Federasiyası iştirak edib.
Yarışda Mərkəzi Asiya yığma komandası Tacikistan, Özbəkistan, Qazaxıstan və Qırğızıstan dövlətlərindən olan idmançılarla təmsil olunub. Turnirin proqramında 13 döyüş elan olunmuşdu. Döyüşlər K-1 və lou-kik bölmələrində keçirilib. Keçirilən yarış nəticəsində Azərbaycan 6, Mərkəzi Asiya 6 qələbə qazanıb. Azərbaycandan Pərviz Abdullayev və Qırğızıstandan Abubəkir Maşanlo arasında baş tutan 13-cü döyüş dayandırılıb. Belə ki, döyüşdə azərbaycanlı idmançının qaşı partlayıb. Bu döyüşdə heç bir komanda qələbə qazanmayıb. Nəticədə ümumi hesab 6:6 olub. Turnir idman sevərlər tərəfindən böyük marağa səbəb olub və respublikada geniş rezonans doğurub."
AzNews.az