Əhmədinejat BMT-nin Suriya nümayəndəsi ilə görüşdü

İran prezidenti Mahmud Əhmədinejat BMT-nin Suriya üzrə nümayəndəsi Laxdar Brahimi ilə görüşüb. AzNews.az-ın iran.ru saytına istinadən verdiyi xəbərə görə, tərəflər Suriya ətrafında cərəyan edən hadisələri müzakirə ediblər. İran prezidenti vurğulayıb ki, Suriya problemi daxili məsələdir və sülh yolu ilə həll olunmalıdır. O, Suriyada demokratik və şəffaf seçkilərin keçirilməli olduğunu da qeyd edib.

Laxdar Brahimi isə öz növbəsində bildirib ki, Suriya probleminin həlli üçün ilk növbədə ölkəyə silah göndərilməsinin qarşısı alınmalıdır. Yalnız silahlı münaqişə dayanarsa sülhdən danışmaq olar. Bundan əlavə, Brahiminin İran Xarici İşlər naziri Əli Əkbər Salehi ilə görüşdüyü bildirilir. Salehi Brahimi ilə görüşündə qeyd edib ki, onun ölkəsi sülhün yaranması üçün lazımi köməkliyi göstərməyə hazırdır.

Sadiq Musa
AzNews.az