"RevKom" sindromu: Ramiz Mehdiyev- Əli Kərimli işi fonunda tarixi paralellər

AXCP sədri Əli Kərimlinin və partiyanın Rəyasət Heyətinin üzvü Məmməd İbrahimin evində axtarış aparılıb. Mediada yayılan məlumatlara əsasən, Dövlət Təhlükəsizlik Xidmətinin apardığı axtarışlar Ramiz Mehdiyevə açılan cinayət işi çərçivəsindədir. Bilirsiniz ki, hazırda Ramiz Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur. Bakı şəhəri Səbail rayon məhkəməsi Ramiz Mehdiyev barədə 4 ay müddətinə ev dustaqlığı qətimkan tədbiri seçib.

Əgər sözügedən cinayət işi üzrə istintaq Əli Kərimli barədə də ciddi məlumatlar əldə edibsə və nəticədə kifayət qədər şübhə formalaşıbsa, o zaman AXCP sədrinin cinayət təqibindən kənarda qalması mümkünsüzdür. İstənilən hüquqşünas bilir ki, DTX kimi peşəkar bir qurum hərəkətə keçirən məhz əsaslı dəlillər ola bilər. Prosesin davamı isə, artıq istintaqdan, istintaqın məhkəməyə təqdim edəcəyi ilkin sübutlardan, məhkəmənin qərarından asılı olacaq. Cinayət Prossessual Məcəlləsi var, cinayət təqibinin hüquqi əsasları bəllidir. Odur ki, hadisələri hüquqi və prosessual zəmində qabaqlamağa ehtiyac yoxdur. Hüquq-mühafizə orqanları gərəkən addımları da atacaq, gərəkən bilgiləri də verəcək.

İndiki anda məsələni daha fərqli müstəvidə nəzərdən keçirməyi və hər zaman olduğu kimi, tarixdən ibrət götürməyi vacib sayıram.

Azərbaycan Xalq Cümhuriyyətinin 1920-ci ildə necə süqut etdiyi barədə bilgilərimiz bizə bu gün baş verənləri doğru analiz etməyə yetərincə ipucu verir.

1918-ci ilin mayında Tiflisdə elan edilmiş müstəqilliyimiz və cümhuriyyətimiz barədə enində-sonunda bir konsensus, ortaq iradə formalaşmış kimi görünürdü. Ölkənin siyasi elitası ilk baxışda Azərbaycanın müstəqillik, cümhuriyyət və demokratiya modelini müdaifə edirdi. Lakin məsələ heç də nümayiş olunan şəkildə deyildi. Həm dövlət müstəqilliyinə qarşı altdan-altdan işlər gedir, həm də bolşevik Rusiyasının simpatizanları ölkədə ictimai-siyasi sabitliyi pozur, “nicatımız Rusiyadadır” deyə açıq təbliğat aparırdılar. Nəriman Nərimanov- az müddət sonra Zəngəzuru Ermənistana “inqilab hədiyyəsi” olaraq verəcəkdi- Nəsib bəy Yusifbəyliyə yazırdı: “Sovet hakimiyyətinin qüdrətli qolları tamamilə açılacaqdır”. Sonluq da məlumdur. Həmid Sultanovlar, Əliheydər Qarayevlər milli hökumətin üstünə ultimatumlar, çevriliş planları və nəhayət “11-ci Qırmızı Ordu” ilə gəlirdilər.

Yenidən müstəqillik qazanmış Azərbaycanda Əliheydər Qarayev zehniyyətinin iki açıq nümunəsi var.

Birincisi, 2013-cü ildə məlum oldu ki, özünü “müstəqqillik mübarizləri” kimi təqdim edənlərin bir çoxu, əslində, Rusiyanın “beşinci kolon”u imiş. O zaman Rusiyanın “Ziyalılar Forumu”, “Milli Şura” kimi təmtəraqlı adlar altında öz siyasi əlaltılarını Azərbaycanda necə təmərküzləşdirməsi barədə mətbuatda yetərincə material var. Onu da yaxşı xatırlayırsınız ki, Bakıdan Kremlə məktub ünvanlanmış, Vladimir Putin “demokratiya simvolu” elan edilmiş, məluncasına ondan Azərbaycanın iç işlərinə müdaxilə etməsi istənilmişdi.

İkincisi, PA-nın sabiq rəhbəri, hazırda istintaq altında, ev dustağı olan Ramiz Mehdiyevin surəti mediaya sızmış hakimiyyəti və konstitutsion quruluşu zorla dəyişmək üçün Rusiyaya göndərdiyi məktub. Bu məktubda Dövlət Şurası kimi Konstitusiyamızda əks olunmayan bir qurum yaradılmasından, orada “siyasi partiyalar”ın, “ziyalı”ların iştirakından söz açılırdı. Bu “ideya” 2013-cü ildə qurulan forumları və Milli Şuranı xatırlatmaqla bərabər həm də “AzRevKom”u- "Azərbaycan Müvəqqəti İnqilab Komitəsi" ni yada salmırmı?

Suala cavab tapmağı sizin iti ağlınıza həvalə edib, Ermənistanda gedən proseslərə diqqət yetirək. Azərbaycan Qarabağı işğal altından xilas etdikdən sonra Rusiya Ermənistandakı bütün revanşist qüvvələri hərəkətə keçirib. Moskva Ermənistandakı agentura şəbəkəsi azlıq etdiyindən, İrəvana öz açıq təbliğatçılarını da göndərir və erməniləri yeni Qarabağ savaşına təhrik edir. Məqsəd bəllidir: “TRİPP” kimi rəsmiləşn Zəngəzur dəhlizinin işə düşməsinə, Azərbaycan və Ermənistan arasında Ağ evdə- ABŞ prezidenti Donald Trampın şahidliyi ilə paraflanan Sülh Sazişinin rəsmən imzalanmasına mane olmaq.

44 günlük savaşdan öncə AXCP sədri Əli Kərimli Azərbaycan ordusunun hərbi əməliyyatlar aparmağa qabil olmadığını iddia edir, İkinci Qarabağ Savaşından sonra Ramiz Mehdiyev Azərbaycanın tarixi qələbəsi haqqında danışmaq istəmirdi.

Nədən narazı, nədən narahat idilər?

Bəlkə də bu sualın cavabı illərdir səslənən başqa bir soruya- "1990-cı ildə sovet ordusunun törətdiyi 20 yanvar qətliamından sonra Əli Kərimlinin Müdafiə Şurasına üzvülük vəsiqəsi "Krasnaya zvezda" qəzetinə necə gedib çıxmışdı" sualına cavabla birlikdə tapılacaq.

Zənnimcə, bu ölkədə hər kəs çox yaxşı başa düşür ki, müzəffər Ali Baş Komandan İlham Əliyevin sərkərdəliyi ilə Qarabağın azad edilməsi Kremlin Azərbaycanın ayağına keçirdiyi buxovların qırılması deməkdir.

Zənnimcə, bu ölkədə hər kəs çox yaxşı başa düşür ki, üçrəngli bayrağımızın Xankəndidə dalğalanması “Şərq məsələsi”nin bitməsi, Cənubi Qafqazda yeni reallığın yaranması deməkdir.

Zənnimcə, bu ölkədə hər kəs çox yaxşı başa düşür ki, Azərbaycanın ərazi bütövlüyünün bərpa edilməsi tərəqqi üçün zəfər enerjisinin formalaşması deməkdir.

Bütün bunları göz önündə tutduğumuzda “neo-revkom”ların baş tutmayan planlarının məğzi də, məqsədi də ortaya çıxır- Azərbaycanın qazandığı tarixi zəfərin dayanıqlı sülhə çevrilməsinə mane olmaq!

Fəqət indi nə 20-ci əsrin əvvəlləridir, nə də Azərbaycan 23 aylıq respublika!

Kremlin Nərimanovun “qüdrətli" saydığı "qollarının açılmasına" və Azərbaycanı yenidən müstəmləkəyə çevirilməsinə xidmət edənlər ifşa olunacaq və əsla cəzasız qalmayacaqlar!

Taleh ŞAHSUVARLI,
AzNews.az analitik-informasiya portalının Baş redaktoru