Azərbaycan futbolu üçün önəmli hadisə: ESSMA-ya üzv olmaq hansı perspektiv vəd edir? - ŞƏRH

Tofiq Bəhramov adına Respublika stadionu Avropa Stadion və Təhlükəsizlik İdarəçiliyi Assosiasiyası (ESSMA) tərəfindən rəsmi üzv olaraq qəbul edilib. Bu barədə məlumat qurumun rəsmi saytında paylaşılıb. Bildirilib ki, 31 200 tamaşaçı tutumu olan və həm Azərbaycan milli komandasının, həm də “Qarabağ” klubunun ev oyunlarını keçirdiyi stadion, dünyada futbol referisinin adını daşıyan ilk stadiondur. Bu üzvlük stadionun təhlükəsizlik, idarəetmə və xidmət sahələrində beynəlxalq təcrübə mübadiləsinə qoşulmasına geniş imkanlar açır.

AzNews.az şərh edir ki, Tofiq Bəhramov adına Respublika stadionunun Avropa Stadion və Təhlükəsizlik İdarəçiliyi Assosiasiyasına (ESSMA) üzv qəbul olunması sadəcə simvolik deyil, həm də funksional baxımdan strateji bir hadisədir. ESSMA-ya üzvlük bu stadionun Avropa stadionları arasında tanınması ilə yanaşı, infrastruktur, təhlükəsizlik, texniki idarəetmə və kommersiya imkanlarının inkişafında da mühüm dönüş nöqtəsidir.

Əvvəlcə onu qeyd edək ki, ESSMA dünyanın ən iri stadionlarının təcrübə mübadiləsi və peşəkar inkişaf platformasıdır. Bu Assosiasiyaya üzv olmaq, stadionun idarəçiliyinin yalnız yerli qaydalara deyil, beynəlxalq standartlara uyğunlaşdırılması üçün real imkanlar açır. Üzvlüklə yanaşı, stadion artıq ESSMA-nın təşkil etdiyi təlimlərdə, forumlarda, texniki seminar və sahə təcrübəsi proqramlarında iştirak edə biləcək. Bu isə idarəetmənin optimallaşdırılması, tədbir təhlükəsizliyinin artırılması və tamaşaçı məmnuniyyətinin yüksəldilməsi baxımından çox əhəmiyyətlidir.

Digər mühüm məqam – stadionun dayanıqlı inkişaf və kommersiyalaşdırma potensialının artmasıdır. ESSMA-nın yaratdığı şəbəkə vasitəsilə Tofiq Bəhramov stadionu artıq sponsorluq modelləri, bilet satışı texnologiyaları, VIP və hospitality zonalarının yenilənməsi sahəsində qabaqcıl Avropa klublarının və stadionlarının təcrübəsindən bəhrələnə bilər.

Nəhayət, stadionun bu beynəlxalq assosiasiyaya üzvlüyü, həm də Azərbaycanın idman infrastrukturunun Avropa idman ailəsinə daha sıx inteqrasiyasının rəmzidir. Stadionun “Qarabağ” klubunun və milli komandanın ev oyunlarına ev sahibliyi etməsi fonunda bu təcrübə mübadiləsi, həm də azarkeş mədəniyyətinin inkişafına və stadion xidmətlərinin keyfiyyətinin yüksəlməsinə təkan verəcək.

Bir sözlə, Tofiq Bəhramov stadionunun ESSMA-ya üzvlüyü, stadionun özünün təkamülü ilə yanaşı, ölkə futbolunun da infrastruktur və təşkilati baxımdan Avropa standartlarına yaxınlaşması istiqamətində strateji addımdır.

Nuray,

AzNews.az