​Neymar Santos ilə "nikah təzələdi"!

Neymar Santos ilə müqaviləsini 2026-cı ilin sonuna qədər uzadıb.

​Braziliyalı ulduz futbolçu Neymar, Braziliya Seriya A komandalarından olan Santos ilə müqaviləsini 2026-cı ilin dekabr ayının sonuna qədər uzadıb.

​2026-cı il FIFA Dünya Kuboku heyətinə çağırılmağı hədəfləyən Neymar, 2025-ci ilin yanvar ayında futbola başladığı Santos klubuna geri dönmüşdü. 33 yaşlı oyunçu yaşadığı zədələr səbəbindən 2023-cü ildən bəri Braziliya milli komandasında forma geyinməyib.

​Ulduz futbolçu İspaniyanın "Barselona" və Fransanın "PSJ" klublarında oynadıqdan sonra 2023-cü ilin avqust ayında Səudiyyə Ərəbistanının "Əl-Hilal" komandasına transfer olmuşdu.

​Astronomik transfer haqqı və maaş qarşılığında "Əl-Hilal"a imza atan Neymar, 2023-cü ilin oktyabrında milli komandanın heyətində aldığı çarpaz bağ və menisk zədəsi səbəbindən bir il yaşıl meydanlardan uzaq qalmışdı.

​Bu ilin əvvəlində futbola başladığı Santos klubuna qayıdan Neymar, Braziliya Seriya A-da ötən aprel ayında "Atletiko MG" ilə keçirilən matçın ilk hissəsində sol ayağından zədələnmiş və ehtiyat oyunçular skamyasını işarə edərək 34-cü dəqiqədə göz yaşları içində meydanı tərk etmişdi.

Mövsüm,

AzNews.az