"Azərbaycanda yalnız "Qarabağ"ı tanıyıram" – Andre Klennon

“Keşlə”nin Finlandiyanın VPS klubundan heyətinə qatdığı Andre Klennon Qol.az saytına müsahibə verib.

AzNews.az istinadən xəbər verir ki, dünən komandanın düşərgəsinə qoşulan yamaykalı hücumçu Bakı klubuna keçidindən danışıb.

- “Keşlə”yə keçidin necə alındı?

- Menecerim mənə belə bir klubdan təklif olduğunu söylədi. Oturub məsləhətləşdikdən sonra razılıq verdim. Dünən Bakıya gəlmişəm. Artıq yeni klubumla rəsmi müqavilə də imzalamışam. Müqaviləmin müddəti mövsümün sonuna qədərdir.

- “Keşlə” ilə məşqə çıxmısan?

- Hə, ilk məşqimi etmişəm. Amma sadəcə qaçışla kifayətlənmişəm.

- Futbolçular səni necə qarşıladılar?

- Çox yaxşı. Onlar məni gördüklərinə sevindilər. Hamısı mənimlə salamlaşıb-görüşdü.

- “Keşlə” ilə bağlı ilkin təəssüratlarını bilmək maraqlı olardı...

- “Keşlə”nin mehriban kollektivi var. Hamı bir-birilə dost kimi davranır. Yeri gəlmişkən, ilk dəfədir ki, Bakıda oluram. Çox gözəl şəhərdir.

- Bura gəlməzdən əvvəl Azərbaycan Premyer Liqası barədə məlumatın var idi?

- Hə, çempionatınız haqda müəyyən şeylər eşitmişdim. Bildiyimə görə, rəqabətli liqadır.

- Bəs bizim komandalardan hansını tanıyırsan?

- Yalnız “Qarabağ”ı. Onu da Çempionlar Liqasından.

- Son olaraq Finlandiyada VPS klubunun formasını geyinmisən. Az öncə qeyd etdin ki, Azərbaycan çempionatı haqda məlumatın var. Bu iki ölkənin birinciliklərini necə müqayisə edərdin?

- Düzdür, bura VPS klubundan gəlmişəm. Hər iki ölkə çempionatının özünəməxsus tərəfi, fərqli cəhətləri var. Finlandiyada fiziki, Azərbaycanda isə texnikalı futbola üstünlük verirlər.

- Sənin kimi komandanın baş məşqçisi Yuri Maksimov da ölkəmizdə yenidir. Onunla söhbətiniz olub?

- Yox, Azərbaycana yeni gəlmişəm. Ona görə də baş məşqçi ilə geniş danışmaq imkanım olmayıb.

- “Keşlə” mövsümün birinci hissəsini çox pis keçirib. Bunun nəticəsidir ki, komanda hazırda aşağı sıralarda qərarlaşıb. Ümumiyyətlə, autsayder komandanın təklifini qəbul edərkən tərəddüd yaşadın?

- Seçim edərkən komandanın mövqeyinə fikir vermirəm. Çünki çətinliklərlə üzləşməyi sevirəm. Bu isə o deməkdir ki, “Keşlə”ni hazırkı vəziyyətdən çıxarmaq üçün meydanda əlimdən gələnin ən yaxşısını edəcəm.