Azərbaycanlı rəssamın Budapeştdə sərgisi keçiriləcək

Gənc rəssam Çingiz Mehbaliyevin Macarıstanın paytaxtı Budapeşt şəhərində "Həyatınızı rəngləyərək" adlı fərdi rəsm sərgisi keçiriləcək.

Budapeştin ən möhtəşəm saraylarından olan YBL Sarayında təşkil olunan sərginin açılış mərasimi 9 iyul 2013-cü il, saat 18:30-da baş tutacaq.

AzNews.az-ın verdiyi xəbərə görə, Azərbaycanın Macarıstandakı səfiri cənab Vilayət Quliyev və Macarıstan Milli Assambleyasının (Parlamentinin) və Macarıstan-Azərbaycan Parlamentlərarası Dostluq Qrupunun üzvü cənab Tamaş Hegedüş sərgidə açılış nitqi söyləyəcəklər. 5 gün davam edəcək sərgidə rəssamın 30-a qədər rəngkarlıq və qrafika işləri nümayiş etdiriləcək.

Qeyd edək ki, Çingiz Mehbaliyev Azərbaycan Karikaturistlər Birliyinin və SESAN (Serbest Sanatçılar) beynəlxalq rəssamlar ittifaqının üzvüdür.

AzNews.az