Yükdaşıma sektorunda yeni nəzarət mexanizmləri nələri dəyişəcək? - ŞƏRH

İqtisadiyyat Nazirliyi Kollegiyasının "Səyyar vergi yoxlamasının keçirilməsi Qaydaları"na etdiyi son dəyişiklik yükdaşıma sahəsində fəaliyyət göstərən vergi ödəyicilərinə yönəlib. Qərara əsasən, bu kateqoriyada olan subyektlərin vergi yoxlamaları zamanı fərqlənmə nişanlarının düzgün alınıb-alınmaması, daşıma fəaliyyətinin hüquqi əsasları və texniki göstəricilərin ilkin uçot sənədləri ilə uyğunluğu daha diqqətlə yoxlanılacaq.

Aznews.az şərh edir ki, bu dəyişiklik vergi inzibatçılığının dəqiqləşdirilməsi və nəzarət mexanizmlərinin gücləndirilməsi istiqamətində atılan praktiki addım kimi qiymətləndirilə bilər. Daşımaların hüquqi əsaslarını təsdiqləyən sənədlərin, yəni vəkalətnamə, icarə və digər əşya hüquqları müqavilələrinin yoxlamaya daxil edilməsi, qeyri-rəsmi fəaliyyət risklərini minimuma endirərək şəffaf iqtisadi mühitin gücləndirilməsinə xidmət edəcək. Eyni zamanda, faktiki texniki göstəricilərlə ilkin uçot sənədləri arasındakı uyğunsuzluqların aşkarlanması, vergi öhdəliklərinin real fəaliyyətə uyğunluğunu təmin edəcək və vergi bazasının daha dəqiq formalaşmasına şərait yaradacaq.

Bununla yanaşı, fərqlənmə nişanları məsələsinin yoxlamaya daxil edilməsi həm daşımaların hüquqiliyinə nəzarəti, həm də rəqabət şəraitinin tənzimlənməsini gücləndirə bilər. Bu yanaşma daşımaların qanunvericiliyə uyğun əsaslarla həyata keçirilməsini təşviq etməklə yanaşı, yol və nəqliyyat təhlükəsizliyi baxımından da vacibdir.

Yeni dəyişikliklərin vergi orqanları ilə daşıyıcılar arasında qarşılıqlı məsuliyyət və hüquqi şəffaflığı artırması gözlənilir. Bu isə yalnız maliyyə nəzarətinin effektivliyini artırmaqla kifayətlənmir, eyni zamanda daşımalar sahəsində fəaliyyət göstərən sahibkarların fəaliyyətlərinin hüquqi əsaslarının möhkəmlənməsi ilə bazar münasibətlərinin daha stabil və ədalətli tənzimlənməsinə zəmin yaradır.

Nuray,

Aznews.az