“Almaniya Avropada liderlik uğrunda mübarizə aparır” – Zeynal Əmrəliyev

“Almaniya Federal Kanslerinin açıqlaması göstərir ki, Avropa ölkələri müharibənin davam etməsində maraqlıdırlar. ABŞ prosesi istədiyi şəkildə idarə etməyə çalışır və həm Rusiya, həm də Ukraynanı barışdırmaq üçün addımlar atır. Bu çərçivədə Donald Tramp həm Rusiya Prezidenti Vladimir Putinlə, həm də Ukrayna Prezidenti Vladimir Zelenski ilə görüşlər keçirib. Sonuncu Alyaska görüşündə də müharibənin başa çatdırılması istiqamətində mühüm danışıqlar aparılıb. Lakin bütün bunlara baxmayaraq, müharibənin dayandırılması hələlik mümkün görünmür, çünki Rusiya tərəfi buna maraqlı deyil”.

Bu fikirləri Aznews.az-a açıqlamasında siyasi şərhçi Zeynal Əmrəliyev deyib.

Qeyd edək ki, Almaniya kansleri Friedrich Merz Rusiya və Ukrayna liderlərinin görüşünün baş tutmayacağını bildirib. Kansler hesab edir ki, əgər Kreml rəhbəri ikitərəfli danışıqlara razılıq versə, bu, Moskvanın mövqeyinə zidd olacaq. Çünki Rusiya tərəfi Ukrayna Prezidenti Volodimir Zelenskinin hakimiyyətini qeyri-legitim hesab edir. Lakin Putinin Kiyev rəhbəri ilə danışıqlar masasına oturması Kremlin Zelenskinin prezidentliyini legitim olaraq qəbul edəcəyi anlamına gəlir.

Siyasi şərhçi bildirib ki, Alyaska görüşündən sonra Rusiyanın ritorikasında daha sərt ton müşahidə olunur.

“Xüsusilə ötən gün Kiyevə endirilən raket zərbələri müharibə başlayandan bəri paytaxta edilən ən ağır hücum idi. Bundan əvvəl Rusiya Kiyevi bu miqyasda hədəfə almamışdı. İndi isə paytaxtın kütləvi şəkildə hədəfə çevrildiyi aydın görünür. Bütün bunlar Rusiyanın davranışında sərtləşməni göstərir və bu da müharibənin başa çatmasına mane olur. Eyni zamanda, Ukrayna tərəfi də mövcud şərtlərlə müharibəni bitirməkdə maraqlı deyil. Çünki bu, torpaq itkisi hesabına başa gələ bilər. Rusiya da bildirir ki, bu, faktiki olaraq Kiyevin kapitulyasiyası demək olardı. Avropa ölkələri isə buna razı deyil, çünki onların Ukrayna ilə bağlı planları var. Onlar dəfələrlə Kiyevə silah göndəriblər və bu müharibənin tamamilə Rusiyanın qələbəsi ilə başa çatmasını istəmirlər. Bu, Avropanın təhlükəsizliyi üçün ciddi təhdid sayılır. Xüsusilə Şərqi Avropa və Baltik ölkələri üçün bu təhlükə daha qabarıqdır. Buna görə də Avropa dövlətləri müharibənin müəyyən qədər davam etməsinə çalışacaqlar. Burada əsas rol Almaniyaya məxsusdur. Friedrich Merz kansler seçildikdən sonra Almaniyanın Avropa liderliyi uğrunda mübarizəsi yenidən başlayıb və Merz Fransa Prezidenti Emmanuel Makronun təşəbbüslərinə üstün gəlməyə çalışır. Yaxın vaxtlarda Avropa ölkələrinin Ukraynaya yeni dəstək paketi elan edəcəyi və bunun da müharibənin uzanmasına səbəb olacağı gözlənilir. Rusiya tərəfi, o cümlədən Sergey Lavrov da bəyan edib ki, yaxın zamanda müharibənin dayandırılması mümkün deyil. Əksinə, qarşıdakı mərhələdə müharibənin daha da şiddətlənəcəyi ehtimal olunur”.

Rəfiqə NAMAZƏLİYEVA,

AzNews.az