“Berkut” xüsusi təyinatlı milis dəstəsi ləğv edildi - ƏMR

Ukrayna Daxili İşlər naziri "Berkut" xüsusi təyinatlı milis dəstəsinin ləğvi ilə bağlı əmr imzalayıb.

AzNews.az-ın Ukrayna mediasına istinadən verdiyi məlumata görə, daxili işlər naziri Arsen Avakov bildirib ki, bununla bağlı əmri fevralın 25-də imzalayıb: ""Berkut" döyüşçüləri keçmiş hakimiyyətlə müxalifət arasında qarşıdurmalarda iştirak ediblər. Məlum hadisələr zamanı "Berkut"çular qazdan, səsli qumbaralardan və rezin güllələrdən geniş istifadə ediblər. Aksiya iştirakçıları bu qrupun döyüşçülərini mitinqləri dağıdan zaman vətəndaşlara qarşı qəddar davranmaqda, xəsarət yetirməkdə ittiham ediblər. Həmçinin, müxalifət aksiya iştirakçılarının öldürülməsində də "Berkut"u günahkar sayırlar".

Qeyd edək ki, Ukrayna Daxili İşlər Nazirliyinin "Berkut" xüsusi təyinatlı milis dəstəsi 1992-ci ildə formalaşdırılıb. 1990-cı illərdə bu dəstə ölkədə asayişin təmin olunması üçün mütəşəkkil cinayətkarlığa qarşı aparılan əməliyyatlarda iştirak edib.

"Berkut" ötən ilin sonlarından başlayan "Maydan" hərəkatı zamanı təhlükəsizliyin təmin olunmasında yaxından iştirak etsə də, hadisələrin sonrakı mərhələsində hakimiyyətin etiraz edən xalq kütlələrinə qarşı "dəyənəy"i rolunu oynayıb. Bununla da "Berkut" Ukrayna cəmiyyətində öz nüfuzunu itirib.

Məhəmməd
AzNews.az