Fazil Mustafa Prezidentə təşəkkür etdi

Ölkə prezidentinin imzası ilə bu cür anlamlı medalı almaq hamımızı sevindirdi

“Ölkə prezidenti cənab İlham Əliyevə bu qədər geniş spektrdə dəyərli insanlarımızı belə bir anlamlı medalla təltif etməsinə görə bir daha təşəkkürümü bildirirəm”.

AzNews.az xəbər verir ki, bunu millət vəkili Fazil Mustafa president İlham Əliyevin cümhiriyyətin 100 illik yubileyi ilə əlaqədar bir sıra şəxsləri medalla təltif edilməsinə münasibət bildirərkən deyib. O, qeyd edib ki, bu medal 119 millət vəkilindən başlamış media quruluşlarının rəhbərlərinə, dəyərli tədqiqatçılarımıza, ziyalılarımıza təqdim edilib:

“Təltif olunanların içində böyük Məhəmməd Əmin Rəsulzadənin nəvəsi Rəis Rəsulzadənin adının olması xüsusilə sevindirici idi. Ölkə prezidentinin imzası ilə bu cür anlamlı medalı almaq hamımızı təbii ki, sevindirdi və buna görə də hər birimiz öz minnətdarlığını bildirdi. Lakin burada bir anlaşılmaz durum oldu ki, istər-istəməz xoş ovqat yaratmadı. Sosial şəbəkələrdə paylaşımlardan anlaşıldı ki, təltif olunannlara bu mükafatlar müxtəlif sahələrə rəhbərlik edən vəzifəli şəxslər tərəfindən təqdim olunub. Bu çox yaxşı haldır, çünki medal ölkə prezidentinin imzası ilə verilmiş, bu imzaya xüsusi sayğı göstərmək lazımdır və prezidentin adından bu medalın təqdim olunması ritualının xüsusi etik anlamı var. Necə ki, bunu prezidentin köməkçisi Əli Həsənov Rauf Arifoğluna, təhsil naziri Ceyhun Bayramov Anar İsgəndərliyə, KİVDDF-nın sədri Vüqar Səfərli Rəşad Məcidə medal verərkən etdilər. Lakin nə səbəbdənsə Milli Məclisin deputatlarına prezidentin imzası ilə verilən medalları bizə öz köməkçilərimiz Milli Məclis binasından götürərək təqdim etdi və bunu Milli Məclis rəhbərliyi səviyyəsində kimsə təqdim etməyi məqsədəuyğun saymadı. Ən azı Milli Məclisin Komitə sədrləri məhz prezidentin imzasına hörmət əlaməti olaraq kiçik bir təqdimetmə mərasimi düzənləyib medianın qarşısında öz komitələrinin üzvü olan deputatlara bu medalı versəydi daha anlamlı olmazdımı? Bu kimi hallara baxmayaraq ölkə prezidenti cənab İlham Əliyevə bu qədər geniş spektrdə dəyərli insanlarımızı belə bir anlamlı medalla təltif etməsinə görə bir daha təşəkkürümü bildirirəm”.

AzNews.az