Türkiyədə saxlanılan rus jurnalistlər sərbəst buraxıldı - Yenilənib

Televiziya şirkətinin mətbuat xidməti jurnalistlərin yaxın vaxtlarda Rusiyaya deportasiya ediləcəyini açıqlayıb

Türkiyədə saxlanılan Rusiyanın “NTV” kanalının jurnalistləri sərbəst buraxılıb.

AzNews.az-ın xəbərinə görə, İstanbul məhkəməsi bu gün jurnalistləri həbsdən azad edib. Bu barədə “TASS” agentliyinin müxbirinə İstanbul Çağlayan Ədalət Sarayındakı bir mənbə məlumat verib.

“Baş Prokurorluqda ifadə verdikdən sonra iki rus jurnalist sərbəst buraxıldı. Onlarla birlikdə bir Türkiyə vətəndaşı da nəzarətdən azad edildi”, - deyə mənbə bildirib.

Televiziya şirkətinin mətbuat xidməti jurnalistlərin yaxın vaxtlarda Rusiyaya deportasiya ediləcəyini açıqlayıb.

“İlkin məlumata görə, yaxın vaxtlarda həmkarlarımız deportasiya olunmalıdır. Təfərrüatları dəqiqləşdiririk. Hələlik rəsmi məlumatımız yoxdur”.

Xatırladaq ki, dekabrın 4-də Rusiyanın “NTV” telekanalının müxbiri Aleksey Petruşko, operator İvan Malişkin və Azərbaycan əsilli Türkiyə vətəndaşı Aytac Carçıyeva Türkiyənin İstanbul şəhərində PUA istehsal sahələrinin icazəsiz çəkilişi zamanı saxlanılıblar.

***

“Hürriyət”in məlumatına görə, İstanbulda Pilotsuz Uçuş Aparatlarının araşdırma və istehsal mərkəzinin yerləşdiyi sahəni qanunsuz olaraq görüntülədikləri bildirilən Rusiyanın xəbər kanalında çalışan müxbir Aleksey Petruşko, operator İvan Malişkin və onlara yardım etdiyi deyilən Azərbaycan əsilli Türkiyə vətəndaşı Aytac Carçıyeva İstanbul Təhlükəsizlik Müdirliyində 4 gün davam edən dindirmədən sonra Çağlayandakı İstanbul Ədliyyəsinə aparılıb. Prokurorun dindirməsindən sonra hər 3 nəfər sərbəst buraxılıb.