• Qərb
  • 30 Aprel 2019 13:47
  •  653

EBRD Azərbaycan üzrə yeni strategiyanı təsdiqlədi

Bu barədə qurumun Bakıdakı ofisindən məlumat verilib

Avropa Yenidənqurma və İnkişaf Bankının (EBRD) Direktorlar Şurası Azərbaycan üçün Bankın növbəti 5 il ərzində ölkədə investisiyalarını və dövlətlə münasibətlərini yönləndirəcək yeni strategiyanı təsdiq edib.

Bu barədə qurumun Bakıdakı ofisindən məlumat verilib.

Məlumata görə, 2019-2024-cü illər üzrə strategiya aşağıdakı prioritetləri əks etdirir:

Qeyri-neft sektorlarında özəl sektorun inkişafını dəstəkləməklə, özəl və dövlət şirkətlərinin idarəetməsini gücləndirməklə, Bank Azərbaycan iqtisadiyyatının şaxələndirilməsi istiqamətində səylərini davam etdirəcək.

Yerli bank və qeyri-bank təşkilatlarında kreditləşdirməni stimullaşdırmaqla, yerli valyuta və kapital bazarlarının inkişafına yardım etməklə, EBRD yerli bizneslərin maliyyə vəsaitlərinə çıxışının genişləndirilməsi istiqamətində işini davam etdirəcək.

Bərpa olunan enerji mənbələri, artan enerji səmərəliliyi, daha təmiz nəqliyyat və dayanıqlı infrastruktur da daxil olmaqla, Bank ölkənin yaşıl iqtisadiyyatına dəstəyini artıracaq.

EBRD-nin Bakı ofisinin Rəhbəri Ivana Duarte deyib ki, bu yeni strategiya bizim Azərbaycandakı fəaliyyətinə yeni təkan verir:

“EBRD Azərbaycanın öz qeyri-neft sektorunu inkişaf etdirməsi, yerli kreditorların gücləndirilməsi və yaşıl iqtisadiyyatına investisiya qoyuluşlarının artırılmasına yardım etməyə hazırdır. Biz bərpa olunan enerji sektorunda böyük potensialın olduğunu görürük və bu sahədə real dəyişiklik etmək məqsədi daşıyırıq. Səlahiyyətli orqanların enerji bazarında islahatlar aparmaq və biznes mühitini yaxşılaşdırmaq istiqamətində göstərdikləri davamlı səylər bizim öz vəsaitlərimizin ayrılması və başqa mənbələrdən maliyyənin cəlb edilməsinə böyük yardım edəcək”.

EBRD Azərbaycanda aparıcı investordur və indiyədək müxtəlif sektorlara təxminən €3,3 milyard investisiya qoyuluşu edib. Onlar enerji, infrastruktur, bankçılıq, sənaye və kommersiya sahələridir.(report.az)

AzNews.az