“Soçi Qran-Prisinin keçirilməsində Bakı təcrübəsindən istifadə edəcəyik” - Dmitri Kozak

Rusiya Federasiyası baş nazirinin müavini Dmitri Kozak Soçi Qran-Prisinin keçirilməsində Bakı təcrübəsində istifadə edəcəklərini bildirib.

Kozak qeyd edib ki, Formula-1 Azərbaycan Qran-Prisi ilə bağlı çox gözəl təəssüratları yaranıb. Kozak təşkilatçılığın möhtəşəm olduğunu və şəhər trasında hər şeyin gözəl təşkil edildiyini vurğulayıb.

AzNews.az “APA”ya istinadən xəbər verir ki, D.Kozak Rusiyada təşkil olunan yarışın müddətinin 2025-ci ilədək uzadıldığını diqqətə çatdırıb.

“Soçi və Bakı bir-birinə həmişə kömək edir və mövcud təcrübədən yararlanır. 2014-cu ildə Azərbaycan nümayəndə heyəti Soçi Qran-Prisində iştirak edib təcrübə qazanırdı. Hazırda biz Bakının təcrübəsi ilə yaxından tanış oluruq. Bakı və Soçi bir-birinə rəqib deyil, sadəcə tərəfdaşdır. Rəqabətimiz ancaq şəhərlərimizin gözəlliyi baxımından ola bilər. Azərbaycan Qran-Prisi yüksək səviyyədə təşkil olunub. Bu cür yarışın təşkil edilməsi üçün güclü iradə lazımdır. Bakı yüksək səviyyəli təşkilatçılıq bacarığı ilə dünyada daha da tanınmış şəhərə çevrilir”.

Növbəti mövsüm Soçi Qran-Prisinin sentyabrda təşkil olunması ilə bağlı Beynəlxalq Avtomobil Federasiyasına müraciət etdiklərini nəzərə çatdıran Rusiya baş nazirinin müavini bildirib ki, gələn il Rusiya futbol üzrə dünya çempionatına ev sahibliyi edəcək: “Düşünürəm ki, mundial başa çatdıqdan sonra Formula-1 yarışının təşkili üçün sentyabr ayı əlverişli tarixdir”.

AzNews.az