Müsafirlər əksər hallarda otellərdə nəyi yaddan çıxarırlar?

Biz hamımız yola çıxarkən əşyalarımızı topladıqda əksər hallarda nəyisə yaddan çıxarırıq

Bəzən bu, nəticədə mənzilbaşında əldə edə biləcəyimiz hansısa kiçik əşya da ola bilər. Bəzi hallarda isə mühüm əşya səbəbindən səfər pozula bilər. Turistlər tərəfindən təsadüfən otel nömrələrində yaddan çıxarılan əşyaların özünəməxsus reytinqi mövcuddur.

Mehmanxana və otellərin tərtib etdikləri daha çox yaddan çıxarılan kiçik əşyaların siyahısı bəzən özünün qeyri-adiliyi ilə təəccübləndirir.

“Sabai.tv” portalı həm gündəlik işlənən, həm də qeyri-adi əşyalardan nümunələr gətirir.

Çimərlik ləvazimatı

Kurortlarda qonaqların gedişindən sonra onların çimərlik geyimi və məhrəba kimi çimərlik ləvazimatını yaddan çıxarmalarına tez-tez rast gəlmək olar. Həm də bunların əksəriyyəti bilərəkdən yaddan çıxarılır. Çünki onların fikrincə, iki il ardıcıl eyni çimərlik geyimində insanların qarşısına çıxmaq yaxşı deyil.

Günəş eynəkləri

Adətən bu aksesuar tələsik çıxdıqda haradasa dolabçanın üstündə, yaxud vanna otağındakı güzgünün qarşısında qalır; həmçinin şəxsi gigiyena əşyaları da – üz qırxma cihazı, diş fırçası və məcunu, duş üçün lif və gellər. Bunların bəzisi əlbəttə ki, bilərəkdən saxlanılır, çünki evdə onlara o qədər də ehtiyac olmur, digər tərəfdən də baqajda artıq yük əlavə narahatlıq yarada bilər.

Heyvanlar üçün qarderob

Kiçik əşyalar bəzən divan və çarpayının altına düşür və onları görmək mümkün olmur.

Diş protezləri

Su ilə dolu stəkanda qoyulmuş diş protezləri maraqlı və məzəli tapıntı hesab edilir.

İçərisində geyim olan çamadanlar

Bəziləri tələsik olaraq geyimlərini, hətta bəzən qarderobu ilə dolu çamadanını belə qoyub gedirlər. Belə hallarda həyəcanlanmaq lazım deyil, çünki mehmanxana qaydalarına müvafiq olaraq, bu əşyalar bir il ərzində yaddan çıxan əşyaların saxlandığı xüsusi anbarlara yerləşdirilir.

Bəzək əşyaları

Yatarkən çıxarılan bəzək əşyaları çarpayının yanındakı dolabçanın üstündə yaddan çıxaraq otel əmlakına çevrilə bilər.

Enerji yükləyiciləri və batareyalar

Enerjidoldurma qurğularına boşaldılan otağın hər birində rast gəlmək mümkündür, çünki smartfonlar və noutbuklar oteldən çıxanadək qidalandırıcı blokda olur, yalnız yola düşən anda baqaja qoyulur.

Saçqurudan və su qaynatma cihazı

Elə hallar da olur ki, otel xidmətçiləri müsafirlərin yaddan çıxardıqları saçqurudan və su qaynadan cihazı aşkarlayırlar. Xırda şey olsa da, belə aksesuarların itməsi sahibinə mənzilbaşına çatdıqda xoşagəlməz anlar yaşadır.

Dərmanlar

Adətən istirahət zamanı dərmanlar çarpayının yanındakı dolabçalarda, yaxud vanna otağındakı rəflərdə saxlanılır. Çox vaxt geriyə dönəndə bu gözdəniraq yerlərə heç kim nəzər yetirmir. Müsafirdən sonra isə “otelin dərman qutusu”na tibbi preparatlar əlavə olunur.

Pasport və digər sənədlər

Bu itki təkcə evə çatdıqda “başağrısı” yaratmır, həm də geriyə olan bütün yolu poza bilər. Sənədlərin itkisindən yaxa qurtarmaqdan ötrü onların keyfiyyətli surətlərindən istifadə etmək məsləhətdir.

Kiçik heyvanlar

Bəzi hallarda yerli bazarlardan alınan kiçik heyvanlar da mehmanxana nömrələrində unudulur. Uşaqlar tez-tez tısbağa və ya balıq aldırır, nəticədə bunların tamamilə lazımsız olması məlum olur.

Sözardı əvəzi

Əslində, bu siyahını sonsuzadək uzatmaq mümkündür. Geriyə qayıtmaq, yaxud digər yerə getmək üçün əşyalarını toplayan turistlərə nə məsləhət vermək olar? Əlbəttə ki, qabaqcadan zəruri əşyaların siyahısını tərtib etmək, sevimli əşyaları yaddan çıxarmamaqdan ötrü bütün dolabçaları, rəfləri, künc-bucağı təkrar-təkrar yoxlamaq lazımdır.(AZƏRTAC)

AzNews.az