İmişli sakinləri aksiya keçirib

AzNews.az musavat.com-a istinadən xəbər verir ki, dünən İmişli şəhərinin bir qrup sakini Lətif Vəliyev küçəsində avtomobil yolunu bağlayıb.

Yolu bağlayan sakinlər Araz çayından çıxarılan tikinti qumunun yaşadıqları küçə ilə İmişli stansiyasına aparılmasına etiraz ediblər: "Gecə-gündüz ağır tonnajlı avtomobillərin hərəkəti bizim rahatlığımızı pozub, tikinti qumu üstüaçıq daşındığından toz-torpaq həyətlərimizə, evlərimizə dolur. Biz istəyirik buna son qoyulsun".

Aksiya keçirilən yerə rayon icra hakimiyyəti və polis şöbəsinin əməkdaşları gəlib.

Rəsmilər sakinlərə tikinti materiallarının bu küçə ilə daşınmasına məhdudiyyət qoyulacağına söz verəndən sonra sakinlər dağılışıblar.

AzNews.az