Günün üçüncü partlayışı- Xətaidə (Yenilənib)

Bakının Xətai rayonunda "Radioquraşdırma" zavodunun yanındakı yanacaqdoldurma stansiyasında partlayış baş verib.


FHN- Dövlət Yanğından Mühafizə Xİdmətindən Trend-ə verilən məlumata görə, hadisə stansiyanın yeraltı qaz çənində qaz sızması nəticəsində baş verib.

Məlumata görə, partlayış nəticəsində yanğın olmayıb.

Bakı şəhər Təcili və Təxirəsalınmaz Tibbi Yardım Stansiyasından Trend-ə bildiriblər ki, hadisə saat 16:20-da baş verib.

Hadisə yerinə Bakı şəhər Təcili və Təxirəsalınmaz Tibbi Yardım Stansiyasının (BŞTTTYS) həkim briqadaları cəlb olunub.

Şahidlərinin verdiyi məlumata görə, partlayış nəticəsində 2 nəfər ölüb.
BŞTTTYS-dən verilən məlumata görə, partlayış "LUKOİL" şirkətinə məxsus yanacaqdoldurma stansiyasında baş verib.

Stansiyadan həmçinin bildiriblər ki, hadisə nəticəsində 1 nəfər ölüb, 1 nəfər isə ağır xəsarət alıb. Yaralı Respublika Neyrocərrahiyyə Xəstəxanasına yerləşdirilib.(16.39)

***

LUKOIL-ın Bakıdakı ofisindən verilən məlumata görə, hazırda şirkətin mütəxəssisləri hadisə yerindədirlər və partlayışın başvermə səbəbini araşdırırlar.

Trend-in məlumatına görə, partlayış nəticəsində yaxınlıqdakı "Mitsubishi" markalı avtomobilə də ziyan dəyib.

Məlumata görə, LUKOIL-a məxsus həmin yanacaqdoldurma məntəqəsi təmirdən sonra istifadəyə verilməyə hazırlanırmış.

Respublika Neyrocərrahiyyə Xəstəxanasından verilən məlumata görə, yaralı 1986-cı il təvəllüdlü Turabov Həşimdir. Hazırda yaralının vəziyyəti kafi qiymətləndirilir.

FHN-in Trend-ə bildirdiyinə görə, hadisə zamanı iki nəfər ölüb. Onlar Orucov Şamxal və İmamverdiyev Həsrətdir.

Ölənlər məntəqədə aparılan son tamamlama işlərində çalışan şəxslər olub.

AzNews.az