Gənclərdən 2 qızıl, 2 gümüş və 3 bürünc medal

Türkiyənin İstanbul şəhərində Əhməd Comərdin xatirəsinə həsr olunmuş gənclər arasında boks turnirinə yekun vurulub. Azərbaycan Boks Federasiyasından AzNews.az saytına verilən məlumata əsasən, 27-ci dəfə təşkil olunan yarışda 16 ölkənin 118 boksçusu qələbə uğrunda mübarizə aparıb. Gənclərdən ibarət milli komandamız qardaş ölkədə 2 qızıl, iki gümüş və üç bürünc medala sahib olub. Boksçularımızdan gənclər arasında Avropa çempionu Pərviz Bağırov (64 kq) bu dəfə də hamıdan güclü olduğunu sübut edib. Həmyerlimiz finalda Özbəkistan təmsilçisi Ənvər Turabovu 15:8 hesabı ilə məğlub edərək, fəxri kürsünün ən yüksək pilləsinə qalxıb.

Daha bir Avropa birinciliyinin qalibi – Rauf Rəhimov (81 kq) da birinci yerə layiq görülüb. Boksçumuz finalda türkiyəli Cem Kılıcı 15:8 hesabı ilə üstələyib. 52 kq çəki dərəcəsində mübarizə aparan Tural Əhmədov yalnız finalda yerli boksçu Cengiz Onata 11:13 hesabı ilə uduzaraq, 2-ci yeri tutub. Orxan Mayıllı da (75 kq) vətənə gümüş medalla dönüb. O, finalda slovakiyalı Yozef Sirotekə 10:18 hesabı ilə məğlub olub. Daha 3 boksçumuz – Kamran Məlikov (52 kq), Fərid İsmayılov (60 kq) və Sadiq Səmədov (91 k1) 3-cü yere sahib olublar.

Ümumkomanda hesabında Türkiyə 1-ci, Azərbaycan 2-ci, Özbəkistan isə 3-cü yeri tutub. Qeyd edək ki, gənclər arasında dünya birinciliyi oktyabrda Tailandda keçirilməli olsa da, AİBA təşkılatçılığı bu ölkədən alıb. Hələ ki, yarışın harada olacağı bəlli deyil.

Yaşar
AzNews.az