Taksi sürücüləri selfi yoxlaması ilə tanınacaq: SİMA sisteminə keçid təhlükəsizliyi artıracaqmı? - ŞƏRH

Azərbaycanın taksi sektorunda təhlükəsizlik və şəffaflıq baxımından əhəmiyyətli bir yeniliyə imza atılıb. Yerli və beynəlxalq taksi platformaları olan “Bolt”, “Uber” və “Yango” artıq SİMA rəqəmsal identifikasiya sistemi ilə inteqrasiya olunub. Bu addım sadəcə texnoloji yenilik deyil, eyni zamanda ictimai etimadın və nəqliyyat təhlükəsizliyinin gücləndirilməsi istiqamətində strateji bir mərhələdir.

Aznews.az şərh edir ki, son illərdə taksi sektorunda qeydiyyatdan keçmiş avtomobildən fərqli nəqliyyat vasitələrinin xidmət göstərməsi və ya sürücü hesablarının başqa şəxslər tərəfindən istifadəsi kimi hallar ciddi narahatlıq doğururdu. Bu hallar sərnişinlərin təhlükəsizliyi və platformaların etibarlılığı baxımından risklər yaradırdı. Yeni tətbiq olunan SİMA texnologiyası bu problemi texnoloji həllə çevirməyi hədəfləyir. Artıq sürücülər sifariş qəbul etməzdən əvvəl və ya sifariş zamanı təsadüfi vaxtlarda selfi yoxlamasından keçməli olacaqlar. Bu üsulla hesabın real sahibinin sürücülük fəaliyyəti həyata keçirdiyi dəqiq şəkildə təsdiqlənəcək.

Bununla yanaşı, istifadə olunan biometrik texnologiya real vaxtda identifikasiya apararaq saxta profillərin və qanunsuz fəaliyyətlərin qarşısını alacaq. Həm platformalar, həm də sərnişinlər üçün daha şəffaf, güvənli və nəzarət olunan bir sistemin əsasları qoyulur. Nəticədə, istifadəçilər özlərini daha təhlükəsiz hiss edəcək, platformaların isə müştəri məmnuniyyəti və brend etibarı artacaq.

SİMA texnologiyası təkcə taksi xidmətləri üçün deyil, ümumilikdə rəqəmsal identifikasiya sahəsində Azərbaycanın innovativ potensialını nümayiş etdirir. Dövlət qurumları və özəl sektor üçün yaradılan bu platforma şəxsiyyətin biometrik təsdiqi ilə vətəndaşların müxtəlif rəqəmsal xidmətlərdən təhlükəsiz istifadə etməsinə şərait yaradır.

Geniş kontekstdə bu yenilik rəqəmsal transformasiyanın sadəcə texnoloji deyil, sosial təhlükəsizlik və idarəetmə keyfiyyətləri baxımından da nə qədər vacib olduğunu göstərir. Beləliklə, taksi sektorunda tətbiq olunan bu texnologiya, həm nəqliyyat xidmətlərinin keyfiyyətini artırır, həm də Azərbaycanda rəqəmsal hökumət modelinin təkamülündə əhəmiyyətli bir nümunəyə çevrilir.

Nuray,

Aznews.az