Avtomobil idxalında struktur dəyişiklikləri - ŞƏRH

Bu ilin ilk yarısında Azərbaycanın avtomobil idxalında həm kəmiyyət, həm də dəyər baxımından ciddi artım müşahidə olunub. Dövlət Gömrük Komitəsinin məlumatına əsasən, ölkəyə 960,7 milyon ABŞ dolları dəyərində 51 727 ədəd müxtəlif təyinatlı avtomobil idxal edilib ki, bu da ötən ilin eyni dövrü ilə müqayisədə müvafiq olaraq 23,3 və 22,2 faiz artım deməkdir. Xüsusilə minik avtomobilləri üzrə 24,2 faizlik artım qeydə alınıb, elektrik mühərriklə hərəkətə gətirilən nəqliyyat vasitələrinin isə sayında fərqli dinamika müşahidə edilib.

Statistik göstəricilər göstərir ki, daxili yanma mühərriklə yanaşı, elektrik mühərriklə də hərəkət edən hibrid nəqliyyat vasitələrinin idxalı 2,6 dəfə artıb və 23 min ədədə çatıb. Bu artım, bir tərəfdən, alternativ enerji ilə işləyən avtomobillərə olan marağın gücləndiyini, digər tərəfdən isə dövlətin enerji səmərəliliyi və ekoloji təmiz nəqliyyat strategiyasının bazarda real nəticələr verməyə başladığını göstərir. Bununla yanaşı, yalnız elektrik mühərriklə hərəkət edən avtomobillərin idxalında 38,3 faiz azalma qeydə alınıb ki, bu da infrastruktur məsələlərinin, qiymətlərin və ya texnoloji adaptasiya proseslərinin hələ tam oturuşmaması ilə bağlı ola bilər.

Sərnişin daşımaq üçün nəzərdə tutulan iri tutumlu nəqliyyat vasitələrinin idxalında 2,4 dəfəlik artım müşahidə olunub. Bu, ictimai nəqliyyat infrastrukturunun yenilənməsi, turizm sektorunda tələbatın artması və ya özəl şirkətlərin logistika imkanlarını genişləndirməsi ilə bağlı ola bilər. Yük və xüsusi təyinatlı nəqliyyat vasitələrinin idxalında isə müvafiq olaraq 0,2 və 21,3 faiz artım qeydə alınıb. Bu rəqəmlər iqtisadiyyatın real sektorundakı canlanmanın logistikaya və sənaye yönümlü nəqliyyat vasitələrinə tələbatı artırdığını göstərir.

Müxtəlif avtomobil növlərinin idxal strukturundakı dəyişikliklər yalnız bazarın texnoloji meyillərinə deyil, həm də tənzimləyici siyasətlərin effektivliyinə işarə edir. Vergi güzəştləri, dövlətin ekoloji təşviq alətləri və beynəlxalq ticarət əlaqələrinin diversifikasiyası bu prosesin arxasında duran əsas amillərdəndir. Lakin yalnız elektrik mühərriklə çalışan nəqliyyat vasitələrinin idxalındakı azalma bu seqmentdə əlavə stimullaşdırıcı mexanizmlərə ehtiyac olduğunu da ortaya qoyur. Nəticə etibarilə, avtomobil idxalındakı struktur dəyişikliklər Azərbaycanın nəqliyyat və ekoloji siyasətlərinin real iqtisadi əks-sədası kimi qiymətləndirilə bilər.

Nuray,

Aznews.az