Ermənistanın dövlət borcu 5 milyard dolları keçib

Ermənistanın dövlət borcu 5 milyard ABŞ dollarını keçib. Ermənistan mətbuatının yaydığı məlumata görə, 2015-ci ilin sonuna ölkənin dövlət borcu 5,071 milyard dollar olub.

AzNews.az Azərtac-a istinadən xəbər verir ki, bunun 4,3 milyard dolları xarici, 461 milyonu isə daxili dövlət borcudur.

Bildirilir ki, Ermənistanın dövlət borcu ötən ilin sonuna olan məlumata görə, ümumdaxili məhsulun yarısından çoxdur. Ümumdaxili məhsulun həcminin dəqiq məbləği iki aydan sonra müəyyən olacaq. Ona görə də dövlət borcunun ümumdaxili məhsulun 60 faizindən çox olacağı istisna edilmir.