Gürcüstanda siyasi proseslər gərginləşir

Gürcüstanın Baş naziri Bidzin İvanişvili gürcü mətbuatında tez-tez qaldırılan impiçment məsələsinə şəxsən aydınlıq gətirib. AzNews.az-ın bu ölkə mətbuatına istinadən verdiyi xəbərə görə, İvanişvili bildirib ki, Saakaşvilini impiçment təhlükəsi gözləmir: "Biz rəqiblərimizə onların özlərinə yox, ölkəmizə layiq münasibət göstərəcəyik. Mənim və partiyam tərəfdən siyasi impiçment olmayacaq. Proseslər hüquqi müstəvidə gedir və onun nəticələri isə təəccüblü ola bilər".

O, həmçinin əlavə edib ki, konstitusiya dəyişiklikləri ilə bağlı prosesləri sürətləndirmək istəyir.

Ekspertlər isə "hüquqi müstəvidə proseslər gedir" ifadəsiylə İvanişvilinin ciddi eyhamlar vurduğu qənaətindədirlər. Hesab edilir ki, Saakaşviliyə qarşı gizli dinləmələrlə bağlı cinayət işi açıla və həbs oluna bilər. Bunun üçün sabiq Müdafiə naziri Okruaşvilidən istifadə etmək istəyirlər.

Sadiq Musa
AzNews.az