Nahid Bağırov yenidən vitse-prezident oldu

Xəbər verdiyimiz kimi Kolumbiyanın Medelin şəhərində Ümumdünya Turizm Təşkilatının 21-ci sessiyası keçirilir. Sessiyada 120 dövlətdən 900 nümayəndə iştirak edir.

AzNews.az xəbər verir ki, Mədəniyyət və Turizm Nazirliyindən "Qafqazinfo"ya verilən məlumata görə, sessiyanın sentyabrın 14-də keçirilən iclasında təşkilatın bir sıra strukturlarına seçkilər olub. Azərbaycan Turizm Assosiasiyasının (AzTA) idarə heyətinin sədri Nahid Bağırov 2 il müddətinə Ümumdünya Turizm Təşkilatına qoşulmuş üzv dövlətlərin Avropa üzrə vitse-prezidenti seçilib.

Bu gün ÜTT qoşulmuş üzv dövlətlərini 400 təşkilat təmsil edir. Bunlar hava yolları, turizm şirkətləri və büroları, reklam agentlikləri, universitetlər, turizm biznes məktəbləri, məşhur mehmanxanalar və digər təşkilatlardır.
Sessiya işini sentyabrın 17-də yekunlaşdıracaq.