Tramp bu gün Putin və Zelenski ilə danışacaq

ABŞ prezidenti Donald Tramp bu gün Rusiya prezidenti Vladimir Putinlə telefonla danışacaq.

Kremlin sözçüsü Dmitri Peskov görüşün Moskva vaxtı ilə saat 17:00-da baş tutacağını bildirib.

"Görüşün mövzuları ticarət və orta hesabla həftədə 5000-dən çox rus və ukraynalı əsgərin ölümünə səbəb olan qan gölünün dayandırılması olacaq", - Tramp şənbə günü "Truth Social" hesabında deyib.

Bu barədə cümə günü İstanbulda Ukrayna və Rusiya nümayəndələri arasında təkbətək danışıqlardan sonra açıqlama verilib. İki ölkə son üç ildə ilk dəfə birbaşa danışıqlar aparıb.

Tramp bundan əvvəl Putinlə birbaşa danışana qədər sülh danışıqlarında ciddi irəliləyişin olacağını düşünmədiyini bildirmişdi.

“İstəsəniz də, istəməsəniz də, mən Putinlə görüşənə qədər heç nəyin baş verəcəyinə inanmıram”, – Tramp həftənin əvvəlində jurnalistlərə deyib.

Tramp Putinlə görüşündən sonra Ukrayna prezidenti Volodimir Zelenski və NATO-nun müxtəlif üzvləri ilə danışmağı planlaşdırdığını bildirib.

Böyük Britaniyanın baş naziri Keir Starmer ABŞ, İtaliya, Fransa və Almaniya liderləri ilə müharibəni müzakirə edib.

Fransa prezidenti Emmanuel Makron dünənki görüşdən sonra sosial mediada "Sabah prezident Putin prezident Trampın təklif etdiyi və Ukrayna və Avropanın dəstəklədiyi 30 günlük qeyd-şərtsiz atəşkəsi qəbul edərək sülh istədiyini göstərməlidir" deyib.

Mövsüm

Aznews.az