Çin atəşkəs çağırışı etdi

Çin bildirib ki, hərbi əməliyyatların tam dayandırılması “ən yüksək dərəcədə vacibdir” və davam edən danışıqlar “xüsusi əhəmiyyət daşıyır”.

Bu açıqlama İranın xarici işlər naziri Abbas Əraqçi ilə Çinin baş diplomatı Vanq Yinin Pekində görüşündən sonra verilib.

Çinin Xarici İşlər Nazirliyi bildirib ki, Vanq Yi Əraqçiyə Çinin “İranın etibarlı strateji tərəfdaşı” olduğunu deyib və tərəflərin Hürmüz boğazında təhlükəsiz keçidin təmin olunması ilə bağlı beynəlxalq çağırışlara cavab verəcəyinə ümid etdiyini ifadə edib. Görüş, ABŞ prezidenti Donald Tramp ilə Çin prezidenti Si Cinpin arasında planlaşdırılan görüşdən az əvvəl baş tutub.

İran dövlət mediasının məlumatına görə, Əraqçi Çini İranın “yaxın dostu” adlandırıb və bildirib ki, mövcud şəraitdə iki ölkə arasında əməkdaşlıq daha da güclənəcək. Vaşinqtonla aparılan danışıqlara toxunan nazir deyib: “Danışıqlarda qanuni hüquq və maraqlarımızı qorumaq üçün əlimizdən gələni edəcəyik... Biz yalnız ədalətli və hərtərəfli razılaşmanı qəbul edirik”.

Mövsüm,

AzNews.az