Azərbaycana qarşı kiberhücum kampaniyası

Milli Məclisin Xarici müdaxilələrə və hibrid təhdidlərə qarşı komissiyası ölkəmizə qarşı davam edən informasiya kampaniyasına dair açıqlama yayıb.
Milli Məclisin Xarici müdaxilələrə və hibrid təhdidlərə qarşı komissiyası 6 avqust 2025-ci il tarixli açıqlamasının davamı olaraq bildirir ki, "Facebook" sosial media və sosial şəbəkə platformasının Azərbaycan seqmentində qonşu dövlətlərdən birinin ərazisindən ölkəmizə qarşı aparılan informasiya kampaniyası avqust ayı ərzində davam edib.
Dezinformativ xarakterli və təxribatçı fikirləri əks etdirən kampaniya vahid mərkəzdən idarə olunmaqla yeni yaradılmış "Caspian Xəbər", "Caspian Times", "İşıq Media", "Pro Eminent Guild", "Next Azerbaijan" və sair bu kimi səhifələr vasitəsilə həyata keçirilib.
Qeyd olunmalıdır ki, geosiyasi hədəflərə nail olmaq məqsədilə Azərbaycan Respublikasının informasiya məkanına edilən bu cür müdaxilə cəhdlərinin qarşısı aidiyyəti dövlət qurumları ilə birgə fəaliyyət nəticəsində müvəffəqiyyətlə alınır.
Eyni zamanda, bildiririk ki, "Meta" şirkətinə edilən müraciətlər nəticəsində Azərbaycana qarşı fəaliyyət göstərən səhifələrin hamısı ləğv etdirilib.
Xarici müdaxilələrə və hibrid təhdidlərə qarşı komissiya vətəndaşlarımızı diqqətli olmağa, saxta informasiyalara inanmamağa çağırır, bənzər sosial media səhifələri ilə rastlaşdıqda bu barədə Milli Məclisin office@meclis.gov.az elektron poçt ünvanına məlumat verməyi xahiş edir.
Öncə onu deyək ki, Milli Məclisin bəyanatında qeyd olunan qonşu dövlətlərdən birinin məhz Rusiya olması istisna deyil. Belə ki, Rusiyanın son zamanlar Azərbayacaa qarşı ortaya qoyduğu aqressiya ritorikası fonunda kiberhecumların da baş verməsi mümkündür.
Nəzərə almaq lazımdır ki, bir neçə gün əvvəl Azərbaycanda internetin verilməsində müəyyən fasilələr yaranmışdı. Sonradan məlum oldu ki, bu, kiberhücumun nəticəsidir.
Ümumiyyətlə, indiki dövrdə nəinki Rusiyadan və qonşu ölkələrdən bütün dövlətlərdən kiberhücum gözləniləndir. Kiberhücumlar bir növ soyuq müharibənin tərkib hissəsi kimi çıxış edir.
Belə cəhdlərdə əsas məqsəd hədəf seçilən ölkəni informasiya təhlükəsizliyinə təhdid yaratmaq, media seqmentində saxta xəbərlər yaymaq, səhih informasiyaya çatımlığı çətinləşdirməkdir. Həmçinin adətən qarşı tərəfin müəyyən məlumatlarının, o cümlədən hərbi və dövlət sirləri sayılan məlumatların ələ keçirilməsi üçün də kiberhücumlar həyata keçirilir.
Kiberhücumlar artıq ən güclü silahlardan birinə çevrilib. Getdikcə kütləviləşən bu dinamikadan kimsə sığortalanmayıb. Bu, Azərbaycan üçün də istisna deyil. Təbii ki, preventiv və adekvat tədbirlər həyata keçirilir. Eyni zamanda media savadlılığı gücləndirilməlidir. Cəmiyyətdə oxşar təhdidlərə qarşı immunitet gücləndirilməlidir. Bu məsələdə həm dövlətin, həm də müvafiq qurumların öhdəsinə məsuliyyət düşür.
Düşünmək olar ki, oxşar təhdid və cəhdlər bundan sonra da davam edəcək, Azərbaycan hökuməti və cəmiyyəti bunlara hazır olmalıdır.
Kənan Novruzov