Bakıda uşaq tərbiyəçi tərəfindən amansızcasına döyüldü - Video

Valideyn 5 yaşlı övladının bağçada müəllim-tərbiyəçi tərəfindən döyüldüyünü iddia edir.

AzNews.az Xəzərxəbər-ə istinadən xəbər verir ki, Paytaxt sakini Vüqar Qocayev oğlu Umudun ötən gün bağçada Qala adlı müəllimə-tərbiyəçi tərəfindən döyüldüyünü iddia edir. Hadisənin Binəqədi rayonu 193 saylı körpələr evində baş verdiyi bildirilir.

Ata övladını bağçaya yola salarkən sifətində heç bir iz-yara olmayıb. Amma axşam bağçaya gedəndə aşkar edib ki, uşağın dodağında yara var.

Valideyn dünən mobil telefon vasitəsilə Umudun bağça yoldaşlarından məlumatı dəqiqləşdirib. Onlar da Umudun həqiqətən də tərbiyəçi tərəfindən zorakılığa məruz qaldığını bildiriblər.

Məsələ ilə bağlı sözügedən bağçaya getdik. Bağça rəhbərliyinin məzuniyyətdə olduğu deyildi. Qısa da olsa, 5 yaşlı Umudu döydüyü iddia edilən Qala adlı müəllimə ilə də söhbətləşə bildik. Umud kameramız önündə bir daha müəlliməsi tərəfindən vurulduğunu desə də, qadın bütün deyilənlərin yalan olduğunu bildirdi.

Müəllimə-tərbiyəçi iddia edir ki, uşaq sinifdə ya özü yıxılıb, ya da evdən gələndə bu vəziyyətdə olub.

Vüqar Qocayev məsələ ilə bağlı Binəqədi rayon 5-ci polis bölməsinə müraciət edib. Sözügedən məsələyə hüquqi qiymət araşdırmalardan sonra veriləcək.