Formula 1-in Azərbaycana iqtisadi qatqıları: turist xərcləri və dolaylı təsirlər - ŞƏRH

2024-cü ildə Azərbaycanda keçirilmiş Formula 1 yarışları ölkəyə gələn turistlərin iqtisadi fəallığını əhəmiyyətli dərəcədə artırıb. "Mastercard"ın məlumatına görə, bu ilki grand-pri zamanı turistlərin həyata keçirdiyi dövriyyə 2023-cü illə müqayisədə 85 % artıb, gələn turistlərin sayı isə 87 % çoxalıb. Əməliyyatların sayı 77 %, otel xərcləri 127 %, restoran xərcləri isə 141 % artıb. Xüsusilə Türkiyə və Böyük Britaniyadan gələn turistlərin xərclərində nəzərəçarpan artımlar qeydə alınıb ki, bu da ölkənin turizm və xidmət sektorlarına ciddi töhfə göstərir.

Formula 1-in Azərbaycana iqtisadi qatqısını qiymətləndirərkən, həm birbaşa, həm də dolayı təsirləri nəzərə almaq vacibdir. Birbaşa təsir turistlərin otel, restoran, nəqliyyat və əyləncə xərclərində özünü göstərir. Məlumatlardan görünür ki, otel xərclərinin 127 % və restoran xərclərinin 141 % artması yerli bizneslər üçün mühüm gəlir mənbəyi yaratmışdır. Bununla yanaşı, müxtəlif ölkələrdən gələn turistlərin davranış fərqlilikləri də yerli bazarın strategiyasına təsir edir. Məsələn, Türkiyə və Böyük Britaniyadan gələn qonaqların xərclərinin artması göstərir ki, ölkəmiz müəyyən regionlardan daha yüksək gəlir potensialı əldə edə bilər və bu məlumat turizm marketinqi üçün hədəf seqmentlərinin formalaşdırılmasında istifadə oluna bilər.

Dolayı təsirlər isə daha geniş iqtisadi çərçivədə görünür. Artan turist axını və əməliyyat sayı yerli xidmət sektorunun rəqəmsallaşması üçün imkan yaradır. Ödəniş sistemlərinin istifadəsi və elektron əməliyyatların həcminin artması ölkədə rəqəmsal iqtisadiyyatın inkişafına töhfə verir. Eyni zamanda, belə beynəlxalq idman tədbirləri ölkənin qlobal görünürlüğünü artırır, investisiya mühitinin cəlbediciliyini gücləndirir və gələcəkdə digər beynəlxalq tədbirlərin təşkilinə zəmin hazırlayır.

Ümumilikdə, Formula 1 kimi yüksək səviyyəli idman tədbirlərinin Azərbaycan iqtisadiyyatına təsiri çoxşaxəlidir. Onlar yalnız turizm sektoruna deyil, otel və restoran biznesindən tutmuş, rəqəmsal ödəniş sistemlərinə qədər geniş spektrdə fayda təmin edir. Əldə olunan statistika və təhlillər göstərir ki, bu cür tədbirlər həm qısamüddətli dövriyyəni artırır, həm də uzunmüddətli iqtisadi təsirləri formalaşdırır. Eyni zamanda, turistlərin xərcləmə davranışının öyrənilməsi, yerli bazarın adaptasiyası və marketinq strategiyalarının optimallaşdırılması üçün mühüm məlumat bazası yaradır.

Nuray,

Aznews.az