Elşad Abdullayev Bakı merinin “siyahısından” silinməyib - FOTO

Elşad Abdullayevin rektoru olduğu və 2010-cu ildə fəaliyyəti dayandırılan Azərbaycan Beynəlxalq Universitetinin adı hələ də Bakı Şəhər İcra Hakimiyyətinin www.baku-ih.gov.az saytından çıxarılmayıb. Belə ki, sözügedən saytda paytaxtda fəaliyyət göstərən ali təhsil müəssisələrinin siyahısında ABU-nun da adı var.

İcra hakimiyyətinin rəsmi internet ünvanındakı "Təhsil" bölməsində Beynəlxalq Universitetin yerləşdiyi ünvan, iki sabit telefonu, bir mobil telefon nömrəsi, bir faks nömrəsi, eləcə də info@abu.az elektron poçt ünvanı və www.abu.az internet ünvanı yer alıb.

Məlumat üçün bildirək ki, ABU 1997-ci il oktyabrın 17-də Ədliyyə Nazirliyində dövlət qeydiyyatına alınmışdı. Təhsil Nazirliyinin 04.12.1997-ci il tarixli 48-11-4058/16 saylı qərarı ilə ilk dəfə lisenziya alıb. 2010-cü ildə təhsil naziri Misir Mərdanov universitetin lisenziyasının qüvvədə olma müddətinin uzadılmaması barədə əmr imzalayıb.

Elnarə Əlosmanqızı
AzNews.az