Hind okeanının Cənub-Şərqi Hind silsiləsində 6 bal gücündə zəlzələ qeydə alınıb

Hind okeanının Cənub-Şərqi Hind silsiləsi bölgəsində 6 bal gücündə zəlzələ baş verib.

ABŞ Geoloji Xidmətinin (USGS) məlumatına görə, yerli vaxtla saat 04:53-də qeydə alınan zəlzələnin episentri Cənub-Şərqi Hind silsiləsində yerləşib.

Bildirilib ki, yeraltı təkanlar 10 kilometr dərinlikdə baş verib və bu zəlzələ yeni ilin bu gücdə qeydə alınan ilk zəlzələsi olub.

Hind okeanının cənub-şərqində seysmik aktivliyə təsir göstərə biləcəyi qeyd olunan 6 bal gücündə zəlzələnin episentri yaşayış məntəqələrindən uzaqda yerləşdiyi üçün hər hansı dağıntı və ya insan tələfatı barədə məlumat verilməyib.

Qeyd edək ki, Cənub-Şərqi Hind silsiləsi tektonik plitələrin yavaş-yavaş bir-birindən uzaqlaşması nəticəsində formalaşmış sualtı dağ silsiləsi kimi tanınır.

Mövsüm,

AzNews.az