Pekindən Vaşinqton və Tehrana xəbərdarlıq: Atəşkəsi hərbi manevrə çevirməyin!

Çinin nüfuzlu "Global Times" qəzeti redaksiya məqaləsində ABŞ, İsrail və İranı qısamüddətli atəşkəsdən istifadə edərək uzunmüddətli sülhə nail olmağa çağırıb. Məqalədə vurğulanır ki, münaqişədə yaranan fasilə hərbi mövqeləri gücləndirmək üçün bir fürsət kimi qiymətləndirilməməlidir.

"Sülh pəncərəsi" və səmimiyyət sınağı

Nəşr qeyd edir ki, hazırda hər üç tərəf atəşkəsə meyillidir və ABŞ ilə İranın danışıqlar masasına oturmağa hazır olması müsbət xəbərdir:

"İki həftəlik müddət elə də uzun deyil, ona görə də tərəflər bu qısa fürsət pəncərəsindən maksimum yararlanmalıdırlar. Əsas sınaq tərəflərin dialoqda nə dərəcədə səmimi olacaqları və sülhə nail olmaq istəkləridir. Əgər danışıqlar sadəcə vaxt qazanmaq və güc toplamaq üçün bir "taktiki gediş" kimi istifadə olunarsa, münaqişə hər an yenidən alovlana və Yaxın Şərqdə, eləcə də dünyada sabitliyə ciddi təhlükə yarada bilər."

Qarşılıqlı güzəştlər və böyük dövlətlərin məsuliyyəti

Qəzet tərəfləri bir-birinin narahatlıqlarını nəzərə almağa çağırıb. Xüsusilə vurğulanıb ki, danışıqların hər hansı mərhələsini tələsik şəkildə "təslimiyyət" və ya "məğlubiyyət" kimi qələmə verməkdən çəkinmək lazımdır. Bu cür yanaşmalar prosesi daha da mürəkkəbləşdirə bilər. Məqaləyə görə, böyük dövlətlər bu prosesdə üzərlərinə düşən məsuliyyəti nümayiş etdirməlidirlər.

Diplomatik səylərin nəticəsi

"Global Times" yazır ki, ABŞ və İran arasındakı müvəqqəti atəşkəs beynəlxalq diplomatik səylərin mərhələli nəticəsidir. Beynəlxalq birlik bu fürsətdən istifadə edərək Körfəz və Yaxın Şərq regionunda sabitliyin bərpası üçün kollektiv fəaliyyəti gücləndirməlidir.

Mövsüm

AzNews.az