Yaponiya Çinlə bağlı diplomatik statusu aşağı salıb

Yaponiya ötən ilin xarici siyasət hesabatında "ən mühüm ikitərəfli münasibətlərdən biri" kimi xarakterizə etdiyi Çinin statusunu bu il "mühüm qonşu ölkə" səviyyəsinə endirib.

"Kyodo" agentliyinin məlumatına görə, Yaponiyanın xarici işlər naziri Moetgi Toşimitsu kabinet iclasında ölkənin xarici siyasəti və fəaliyyəti haqqında illik diplomatik hesabatı təqdim edib. Yeni hesabatda rəsmi Pekinin Yaponiyaya qarşı "bir tərəfli tənqidləri və təzyiq xarakterli hərəkətləri artırdığı" qeyd olunub. Bununla belə, sənəddə Tokionun Pekin rəhbərliyi ilə dialoq və qarşılıqlı təmaslara açıq olduğu da ifadə edilib.

Diplomatik gərginliyin səbəbləri

Statusun dəyişdirilməsi Yaponiya Baş naziri Takaiçi Sanaenin Tayvana hərbi müdaxilə ehtimalını gündəmə gətirən açıqlamaları fonunda iki ölkə arasında yaranan gərginliyin davamı kimi qiymətləndirilir.

Tarixi bəyanat

Baş nazir Takaiçi 7 noyabr 2025-ci ildə parlamentdəki (Diet) çıxışı zamanı Tayvan boğazına hərbi müdaxiləni "ölkəsinin varlığını təhdid edən vəziyyət" kimi dəyərləndirəcəyini və hərbi gücdən istifadə edə biləcəyini vurğulayıb.

Strateji dönüş

Bu açıqlama ilə ilk dəfə bir Yaponiya Baş naziri Tayvanın işğalı halında ölkənin hərbi müdaxilə edəcəyini açıq şəkildə bəyan edərək, uzun illərdir davam edən "strateji qeyri-müəyyənlik" siyasətindən kənara çıxıb.

Pekinin reaksiyası

Çin rəhbərliyi Yaponiyanın Pekindəki səfirini Xarici İşlər Nazirliyinə çağıraraq etiraz notası təqdim edib və Baş nazirin sözlərini geri götürməsini tələb edib.

Takaiçi reaksiyalardan sonra Tayvanla bağlı fikirlərinin ehtimal xarakterli olduğunu və gələcəkdə bu cür şərhlərdən qaçacağını bildirsə də, söylədiyi fikirləri geri götürməkdən imtina edib.

Mövsüm,

AzNews.az