İslam Kərimov vəfat etdi

Özbəkistanın ilk prezidenti İslam Abduqəniyeviç Kərimov vəfat edib.

AzNews.az xəbər verir ki, bu barədə Reuters agentliyi məlumat yayıb. Sözügedən agentlik məlumatı 3 diplomatik mənbədən əldə etdiyini vurğulayıb.

Qeyd edək ki, İ. Kərimov avqustun 27-də beyninə qan sızması səbəbindən xəstəxanaya yerləşdirilib. Bu gün isə Özbəkistan Nazirlər Kabinetinin rəsmi saytında İslam Kərimovun səhhətinin kəskin pisləşməsi ilə bağlı məlumat yerləşdirilib.

Yerli "Fərqanə" agentliyi isə Kərimovun avqustun 29-da vəfat etdiyini iddia edirdi. Sayt onun ölümünün bu gün elan ediləcəyini, sabah isə Səmərqənddə dəfn olunacağını yazmışdı.

Məlumat üçün bildirək ki, İslam Kərimov 1938-ci ilin yanvarın 30-da Səmərqənddə anadan olub. 1990-cı ildə Özbəkistanın ilk prezidenti seçilib.