Saxta diplom satan fəlsəfə doktoru niyə azadlığa buraxıldı?

Xəbər verdiyimiz kimi, bir müddət əvvəl Daxili İşlər Nazirliyinin əməkdaşlarının keçirdiyi əməliyyat-axtarış tədbirləri nəticəsində saxta diplomların alış-satışı ilə məşğul olan Bakı şəhər sakinləri Məhəmməd Şahməmmədov, Ceyhun Nəcəfov, Azif Hüseynov və Şəki rayon sakini Musa Musayevdən Rusiya Federasiyasının və Azərbaycan təhsil müəssisələrinə aid 6 ədəd diplom, saxta diplom alınması üçün 10 ədəd attestat, 2 ədəd şəhadətnamə, 3 ədəd ümumvətəndaş pasportu və digər sənədlər aşkar edilərək götürülüb.

AzNews.az-a daxil olan başqa bir məlumata görə isə, Ceyhun Nəcəfov Azərbaycan Milli Elmlər Akademiyası (AMEA) Fəlsəfə, Sosiologiya və Hüquq İnstitutunun işçisi, siyasi elmlər üzrə fəlsəfə doktorudur.
AzNews.az-a daxil olan daha bir məlumata görə, Ceyhun Nəcəfov artıq azadlığa buraxılıb.

DİN-in mətbuat xidmətinin əməkdaşı Ehsan Zahidovun AzNews.az-a verdiyi məlumata görə, məsələ ilə bağlı araşdırma aparılır. Araşdırmaların nəticəsindən asılı olaraq həmin şəxslər barədə qanuna müvafiq qərar çıxarılacaq: "Araşdırma müddətində isə adı çəkilən şəxslər dindirilib, izahatları alınıb və yaşayış yerləri üzrə polis nəzarətinə veriliblər".

Elnarə Əlosmanqızı
AzNews.az