Mərkəzi Bankdan banklara 46,9 milyonluq hədiyyə - Ekspert

Mərkəzi Bank kommersiya banklarına 46,9 milyon manat faiz ödəyib.

AzNews.az xəbər verir ki, bunu iqtisadçı ekspert Samir Əliyev bildirib. Onun sözlərinə görə, 2017-ci ildə Mərkəzi Bank tərəfindən 60 depozit hərracı keçirilib:

“Hərracların nəticəsi olaraq il ərzində Mərkəzi Bank kommersiya banklarına təxminən 46,9 milyon manat məbləbində faiz ödəyb. Bu, bankların 2017-ci ilin 10 ayı ərzində depozitlərə görə müştərilərə ödədikləri faizlərin 15%-i, müştərilərdən alınan kredit faizlərinin 4%-i qədərdir. Faiz dərəcələrinin aşağı həddi 10,1%, yuxarı həddi 14,87% olub. Müddəti isə 14 gün olub. Mərkəzi Bankın 10 milyard manatlıq depozit təklifinə qarşı bankların tələbi ümumilikdə 25,2 milyard manat olub. Tələb təklifi orta hesabla 2,5 dəfə üstələyib. 60 hərracın cəmisi 5-də tələb təklifdən az olub. Bəzi hərraclarda tələb təklifi 3-4 dəfə üstələyib. Hətta avqust ayında tələb daha da artıb və üstələmə 6-7 dəfə olub”.

Samir Əliyev qeyd edib ki, Mərkəzi Bankın keçirdiyi depozit hərracının əsas məqsədi dövriyyədəki pul kütləsini tənzimləmək, artıq pul kütləsinin valuta bazarına yönəldilməsinin qarşısını almaqdır: “Elə buna görə də dövri olaraq 400-900 milyon manat civarında vəsait Mərkəzi Bankın “sandığında” saxlanılıb. Hərracın digər məqsədi banklara dəstək verməkdir. Təsadüfi deyil ki, Mərkəzi Bank yola saldığımız ildə hər banka orta hesabla 1,5 milyon manatlıq “dəstək” verib. Banklar riskli kreditləşmədənsə, asan pul qazanmaq yolunu seçərək vəsaitləri depozit şəklində baş bankda yerləşdirməyə üstünlük veriblər. Depozit hərracı 2016-cı ilin ortasından keçirilməyə başlanıb. İlk hərrac iyunun 13-də təşkil edilib və ilin sonuna kimi 26 hərrac keçirilib”.

Bahar RÜSTƏMLİ
AzNews.az