Bu gəmi ilə Xəzərin çirklənməsinin qarşısı alınacaq

Bunu Dövlət Ekspertiza İdarəsinin rəisi Mirsalam Qənbərov bu gün feysbukda canlı yayımda deyib

“Azərbaycanın relyefinə görə tullantı suları bilavasitə Xəzər dənizinə öz təsirini göstərir. Xəzər Kompleks Ekoloji Monitorinq İdarəsində vaxtilə Yalamadan Astaraya qədər ərazidə 350-dən çox axıntı mənbəyi mövcud idi. Hazırda bu mənbələrin sayı 120-dən aşağıdır”.

AzNews.az xəbər verir ki, bunu Dövlət Ekspertiza İdarəsinin rəisi Mirsalam Qənbərov bu gün feysbukda canlı yayımda deyib. O qeyd edib ki, nazirliyin müvafiq qurumları dənizdən, həmin axarlardan nümunələr götürür və bu nümunələr təhlil edilir.

M. Qəmbərov bildirib ki, uzun müddət nazirliyin açıq dənizdən nümunələr əldə edə biləcək texnikası yox idi. Bu işi görə bilən Əlif Hacıyev adına gəmi iki ilə yaxın təmir olundu və hazırda istifadəyə verilib. Noyabr ayından etibarən gəmi vasitəsilə reydlər keçirilir:

“Noyabr ayında Xəzər dənizinə 10 gün müddətinə ekskursiya təyin olundu və platformalar ətrafındakı sulardan nümunələr götürülərək təhlil olundu. Təhlil müvafiq obyektlərə, xüsusilə neft hasilatı ilə məşğul olan şirkətlərə göndərildi. Bundan sonra bu gəmi vasitəsilə mütəmadi olaraq reydlər keçiriləcək. Artıq bu prosesə başlamışıq. Bu vasitə böyük texniki imkanlara malikdir, içərisində böyük elmi laborotoriya var. Biz bu gəmi ilə reydlər keçirəcəyik və Xəzərin çirklənməsinin qarşısının alınmasında bu gəminin böyük rolu olacaq”.